Сапарбаев Жамбыл облысында мұңын шаққан дәрігердің ауруханасына арнайы комиссия жіберді
Жамбыл облысы әкімінің орынбасары Меркі аудандық ауруханасының жұмысын тексереді, деп хабарлайды Stan.kz ақпарат агенттігі.
Бұл туралы облыс әкімдігінің баспасөз қызметі мәлімдеді.
Жамбыл облысының әкімі Бердібек Сапарбаевтың тапсырмасына сәйкес, әлеуметтік салаларға жетекшілік ететін орынбасары Ержан Жылқыбаев Меркі аудандық ауруханасының медицина қызметкерлерінің шағымдары бойынша кешенді тексеру шараларын жүргізетін арнайы комиссияны басқарады.
Аталған комиссия құрамына тауарлар мен көрсетілетін қызметтердің сапасы мен қауіпсіздігін бақылау департаментінің, прокуратура органдарының, облыс әкімі аппаратының қызметкерлері, қоғам мен кәсіподақ ұйымдарының өкілдері енген.
"Комиссияның басты міндеті – медицина қызметкерлерінің шағымдарындағы барлық айтылған фактілерді объективті және әділ шешу, емдеу мекемесі қызметкерлерінің құқықтарын бұзуға жол бермеу бойынша нақты шаралар қабылдау", - делінген ресми хабарламада.
Егер келтірілген фактілер расталған жағдайда, оған кінәлі барлық лауазымды тұлғалар тиісті жазаға тартылады. Тексеру іс-шараларының қорытындысы жұртшылық назарына ұсынылатын болады.