Рио олимпиадасының ашылу салтанаты қандай тосын сыйлар дайындауда (фото)
Санаулы сағаттардан соң, 5-ші тамыздан 6-сына қараған түні Рио-де-Жанейрода XXXI жазғы олимпиада ойындарының алауы ресми түрде жағылып, ашылу салтанаты өткізіледі. Ал ашылу салтанатында жанкүйерлерді қандай тосын сыйлар күтіп тұрғандығы туралы аздаған шолу жасап өтейік.
Бұл туралы vesti.kz хабарлайды.
Төрт жылдықтың басты додасы алғаш рет Оңтүстік Америкада өткізілгелі отыр. Бразилияның әу бастан карнавалдар мен көңілді мерекелердің отаны екені белгілі. Демек, ашылу салтанаты да түрлі-түсті түстерге боялатыны анық. Әрине, ұйымдастырушылар негізгі қызықтарды құпия ұстап отыр. Салтанатты шараның сценариі басталуға бірер сағат қалғанда ғана белгілі болмақ.
Ашылу мерекесі “Марио Филью” стадионында өтеді. Бірақ, аталмыш стадионның атауы көпшілік пен спортшылар арасында “Маракана” деген атпен таныс.
studioforma.ch
Бұл қайта құрылымдауға дейін 200 мың көрерменді сыйдырған, 2014 жылы Германия құрамасы футболдан әлем чемпионы атанған арена. Қазір мұнда 79 мың адам кіре алады. “Мараканада” ашылу және жабылу салтанатымен қатар, футбол матчтары өткізіледі.
olympteka.ru
Олимпиаданың ең көңілді шарасына 6 мыңдай ерікті тартылған. Олардың тең жартысы бишілер. Оларды дайындайтын тағы 300-ден астам кәсіби би мамандары бар. Таңқаларлығы жоқ, Бразилия бұрыннан-ақ бидің отаны. Шоудың самба, ламбада секілді танымал билермен басталуы да заңдылық. Негізінен ашылу салтанатында барынша ұлттық ерекшеліктер ескерілмек.
olympteka.ru
Ойындардың ашылу салтанаты үш кезеңнен тұрады. Бірінші кезекте, көрермендер Бразилия тарихынан хабар беретін театрландырылған көрініс тамашалайды. Одан соң мәдениет пен ғылым саласындағы жетістіктер көрсетіледі. Рәсім барысында 2 мың түрлі түсті пистолет пен 110 үлкен жарық құрылғылары жұмыс істейді. Сондай-ақ, үш тоннадан астам пиротехниканың да қолданылатынын айта кету керек.
Трибунадан керемет кешті 78 мың адам көре алады. Айтпақшы, бір орынның ең төменгі бағасы 2 мың доллар. Ал ең қымбаты 4 мың доллар.
olympteka.ru
Жалпы шеру кезінде 12 мың спортшы мен команда өкілдері жүріп өтеді. Қатысушылар соңында барлығы бір-бір ағаштан отырғызып, олимпиадалық саябақтың көркеюіне үлес қоспақ.
Басты назар туристер мен спортшылардың қауіпсіздігіне аударылады. Ашылудан жабылуға дейін Рио көшелерінде 85 мың полицей мен әскерилер кезекшілік жасайды.
163gorod.ru
Трансляция барысында шоу-бағдарламаны ашатын модель Жизель Бюндхенді де байқай аламыз. Әншілерден сахнада Каэтан Велозу мен Анитта өнер көрсетеді. Ал олимпиада алауын “футбол королі” Пеле жағады.
mariapreta.org
Шоудың басты қоюшысы өз уақытында “Оскар” сыйлығын алған бразилиялық режиссер Фернанду Мейреллиш. Ол ашылу салтанатына Лондон олимпиадасының ашылу мерекесіне қарағанда 10 есе төмен қаражат жұмсалғанын айтты. Лондонда ашылу шарасына 42 миллион доллар жұмсалған.
expo2015news.org
Ал салтанатты шараның продюсері, Турин қысқы олимпиадасын “ашып-жапқан” Марко Балич. Ол 2008 жылы Пекинде де менеджерлердің бірі ретінде қызмет етті. Сонымен қатар, Сочи олимпиадасында Балич көркемдік жетекшілердің бірі болған еді.
expo2015news.org
Шеру мен шоу-бағдарламаны қоса есептегенде ашылу салтанаты үш сағатқа созылады. Қазақстан құрамасының шығуын шамамен орта шеніне қарай күтуге болады. Еліміздің көк байрағын таэквондошы Руслан Жапаров алып шығады.
altyn-orda.kz
Олимпиада ойындарының ашылуын Астана уақытымен тамыздың 5-інен 6-сына қараған түні 04.55-те тамашалауға болады.
Бұған дейін біздің боксшылардың алғашқы қарсыластары жәнедзюдошыларымыздың алғашқы кездесулері туралы жарияланған. Ал “Қазақстан” және “Kazsport” телеарналарынанолимпиада ойындарының көрсетілімдерін тікелей эфирде тамашалауға мүмкіндік бар.