АҚШ Иранға қарсы ұзаққа созылуы мүмкін операцияға дайындалып жатыр – Reuters
АҚШ армиясы президент Дональд Трамп шабуыл жасау туралы бұйрық берген жағдайда, Иранға қарсы бірнеше аптаға созылуы мүмкін әскери операцияға дайындалып жатыр. Бұл туралы Stan.kz ақпарат агенттігі Reuters порталына сілтеме жасап хабарлайды.
Дереккөздердің айтуынша, ықтимал әскери науқан барысында АҚШ тек Иранның ядролық инфрақұрылымына ғана емес, мемлекеттік нысандары мен қауіпсіздік құрылымдарына да соққы жасауы мүмкін. Алайда жоспардың нақты бөлшектері жарияланған жоқ.
Ақ үйдің баспасөз хатшысы Анна Келли АҚШ президентінің Иранға қатысты барлық әрекет нұсқаларын қарастырып отырғанын мәлімдеді. Оның айтуынша, Трамп түрлі пікірлерді тыңдағанымен, соңғы шешімді елдің ұлттық қауіпсіздігі мен мүддесіне сай қабылдайды. Ал Пентагон Reuters сауалына түсініктеме беруден бас тартты.
Агенттік еске салғандай, 2025 жылдың маусымында АҚШ "Түнгі балға" деп аталған операция жүргізіп, Иранның ядролық нысандарына бір реттік соққы жасаған. Сол кезде Иран шектеулі жауап қайтарған еді.
Қазір ықтимал операцияны жоспарлау әлдеқайда күрделі сипат алған. Сарапшылар мұндай қадам АҚШ әскері үшін тәуекелді күшейтіп, Иранның жауап әрекеттері аймақта кең ауқымды қақтығыс қаупін арттыруы мүмкін екенін айтады.
Өткен аптада АҚШ пен Иран дипломаттары Оманда Тегеранның ядролық бағдарламасына қатысты келіссөздерді жандандыру мақсатында кездесті. Reuters мәліметінше, келіссөздердің екінші кезеңі 17 ақпанда Женевада өтуі мүмкін.
Axios дерегіне сәйкес, АҚШ делегациясының құрамына Джаред Кушнер мен президенттің арнайы өкілі Стив Уиткофф кіруі ықтимал, ал ирандық тарапты сыртқы істер министрі Аббас Аракчи басқармақ.
Бұған дейін Дональд Трамп Иранмен жасалатын кез келген келісім уран байытуды тоқтатуды қамтуы тиіс екенін мәлімдеген. Сондай-ақ ол Тегеран келіссөз жүргізуге ниет білдіргенімен, ядролық бағдарламасына қатысты нақты қадамдарға дайын екенін көрсетпегенін айтты. Ирандағы режим ауысуы туралы сұраққа ол мұны "болуы мүмкін ең жақсы нәрсе" деп көрсетеді.
Еске салайық, бұған дейін Иранда ұлттық валюта құлдырап, жаппай наразылықтар басталғаны, сондай-ақ наразылық акцияларының соңы тәртіпсіздік пен тонауға ұласқаны туралы жазған едік. АҚШ президенті Дональд Трамп Иранның қауіпсіздік күштері наразылық білдірушілерге оқ атқан жағдайда, оларға көмек көрсетуге дайын екенін мәлімдеді. Осы мәлімдемеден кейін Иран өздеріне шабуыл жасалса Израиль мен АҚШ базаларына соққы беретінін ескертті.
Қазақстанда мемлекеттік қызметкерлерге қосымша кәсіп ашуға рұқсат берілді: Бұл кімдерге қатысты
