Қазақстанда мемлекеттік қызметкерлердің жалақысы қашан көтерілетіні айтылды
Ұлттық экономика министрі Серік Жұманғарин Үкіметтің Қазақстанда мемлекеттік қызметкерлердің жалақысын көтеру жоспарын бөлісті. Бұл туралы Stan.kz ақпарат агенттігі хабарлайды.
Министрдің сөзінше, 2024 жылдың 1 қаңтарынан бастап еңбекақы төлеудің жаңа әдістемесі енгізіліп, мемлекеттік қызметкерлердің орташа жалақысы 1,9 есе өскен. Ал жалақысы төмен санаттағы қызметкерлердің табысы 2,2 есе артқан.
Бұдан бөлек, 2025 жылғы 1 қаңтардан бастап жалақысы төмен мемлекеттік қызметкерлердің еңбекақысы тағы 16%-ға көтерілген.
"Бізде мемлекеттік қаржыны басқару тұжырымдамасына негізделген белгілі бір әдістеме бар. Жалақыны енді шамамен үш жылда бір рет, яғни 2028–2029 жылдары көтеруді жоспарлап отырмыз", – деді Серік Жұманғарин.
Министр азық-түлік бағасының өсуіне қатысты да пікір білдірді.
Министрдің айтуынша, азық-түлік бағасы әлі де қымбаттап жатқанымен, өсім қарқыны баяулаған.
"Қыркүйек айында әлеуметтік маңызы бар азық-түлік тауарларының бағасы алғаш рет 0,1%-ға төмендеді. Біз бағаның өсу қарқынын барынша төмендету бағытында жұмыс істеп жатырмыз", – деді ол.
Еске салсақ, бұған дейін ұлттық экономика министрі Серік Жұманғарин Үкімет отырысында салық реформасының нәтижелері туралы баяндаған еді.
