Перизат Қайратқа қатысты тергеу аяқталды: Істе тек екі күдікті бар
Қаржы мониторингі агенттігі “Biz Birgemiz” қорының басшысы Перизат Қайратқа қатысты тергеудің аяқталғанын растады. Қазір тараптар іс материалымен танысып жатыр. Бұл туралы Stan.kz ақпарат агенттігі хабарлайды.
ҚМА төрағасының орынбасары Жеңіс Елемесов іс бойынша шығын көлемі 3,5 миллиард теңге деп анықталған.
"Перизат Қайрат заңсыз келген ақшаны гүл дүкенін сатып алуға жұмсаған. Осылайша өзін қоғамға бизнес леди ретінде танытып, қаржыны бизнестен тапқанын көрсеткісі келген", – деді ол.
Аталған қылмыстық іс бойынша екінші күдікті – Перизат Қайраттың анасы Ғайни Алашбаева.
"Алашбаеваға қатысты үйқамақта ұстау бұлтартпас шарасы тағайындалған. Екеуін де сотқа жіберіп жатырмыз. Оған да алаяқтық бабымен, одан бөлек қылмыстық жолмен табылған ақшаны жылыстату бойынша жауапкершілікке тартып жатырмыз. Ол қызына көмектесіп, ақшаны есепшотына аударып, банктен шешіп үй және көлік сатып алуға көмек берген", – деп қосты Жеңіс Елемесов.
ҚМА дерегіне сәйкес, Перизат Қайрат кінәсін мойындамаған. Ал тәркіленген қымбат дүние-мүлікке қатысты шешімді сот шығарады.
"Тәркіленген мүлік жәбірленушілердің шығынын өтеуге немесе мемлекетке өтеді", – деді ҚМА төрағасының орынбасары.
Сонымен қатар Перизат Қайраттың ісі бойынша бірнеше мәрте адвокат ауысқан. ҚМА дерегіне сәйкес қылмыстық іс 100 томнан тұрады, әр томда 180 бет бар.
Еске салайық, бұған дейін Астана соты әділет департаментінің "Biz Birgemiz Qazaqstan 2030" қоғамдық бірлестігін таратқан еді.