Өскемен жұрты қауіпті газға тұншығып отыр: Шара қолданбаған әкімнің үстінен арыз түсті
Өскемен қаласын күкірт диоксиді мен көміртек оксиді басып қалды. Экологтар қолайсыз ауа райына байланысты қаланың өндірістік аймақтарындағы ауаны тексерді. Бұл туралы Stan.kz ақпарат агенттігі Еуразия бірінші арнасына сілтеме жасап хабарлайды.
Фото: Видеодан скрин
Тексеру кезінде ауада күкірт диоксиді мен тұншықтырғыш газдың нормадан асып кеткені белгілі болды. Қала халқын тұншықтырып отырған қай кәсіпорындардың шығарындысы екені әзірге белгісіз.
“Тергеу нәтижелері шықса кәсіпорындар тексеріліп, жазаға тартылады”, – деп мәлімдеді облыстық Экология департаменті.
Өскемендік заңгер Алексей Божков жергілікті әкімдікті сотқа берді.
20 қарашада атмосфералық ауадан алынған сынамалар тұз қышқылының шекті рұқсат етілген концентрациясынан 9,9 есе асып кеткенін көрсеткен еді. "Қазгидромет" тексеру жүргізіп, нәтижесінде ауадағы көміртек оксиді, PM2.5 ілеспе бөлшектері, күкірт диоксиді және азот диоксиді бойынша тәуліктік орташа шекті мөлшерден асып кеткенін анықтады.
Шығыс Қазақстан облысының мамандандырылған ауданаралық әкімшілік соты заңгердің талап-арызын ішінара қанағаттандырды. Сот тұз қышқылының шекті мөлшерден едәуір асып кетуі туралы халықты хабардар етпей, қорғаныс шараларын жүргізбеген қала әкімінің әрекетін заңсыз деп таныды. Сондай-ақ талапкер қала әкімін күшті уытты заттар бөлінген жағдайда, халықты уақытылы хабардар ету бойынша азаматтық қорғау шараларын қабылдауға міндеттеуді сұрады. Алайда оның бұл талабы бойынша арызын сот қанағаттандырудан бас тартты.
“2024 жылы 20 қарашада Өскеменде қолайсыз метеожағдайлардың 2-дәрежесі тіркелді. Салдарынан атмосфералық ауада тұз қышқылының шекті рұқсат етілген мөлшерден 9,9 есе, сондай-ақ көміртек оксиді, күкірт диоксиді және азот диоксиді деңгейінің айтарлықтай асып кетті. Бұл халықтың өмірі мен денсаулығына қауіп төндірді. Сондай-ақ сот қала әкімі Экологиялық кодекстің 210-бабының 2-тармағында көрсетілген міндеттерін (Халыққа қажет ақпаратты жедел тарату және қолайсыз метеожағдайлар кезінде ауаны ластаушы заттардың шығарындыларын реттеудің уақытша шараларын енгізу) орындамағанын анықтады”, – делінген сот шешімінде.
Сонымен қатар сот мемлекеттік қызметкерлер мен лауазымды тұлғалардың қолданыстағы заңдар мен заңға тәуелді актілердің нормаларын сақтамауы, өз құзыреті шеңберінде жедел шаралар қабылдамауы, мемлекеттік биліктің беделін түсіріп қана қоймай, азаматтық қоғам тарапынан сынның күшеюіне және сот дауларының көбеюіне ықпал ететінін еске салды.
Сот Өскемен қаласы әкімінің тарапынан болған заң бұзушылықтар туралы фактілерді облыс әкіміне жеткізуді және лауазымды тұлғаны қабылданған шаралар туралы бір ай ішінде Шығыс Қазақстан облысының мамандандырылған ауданаралық әкімшілік сотына хабарлауды міндеттеуді тапсырды.
Сот кезінде облыс әкімінің өкілі өзінің жазбаша жауабында қала әкімінің қолайсыз метеожағдайлар кезінде тиісті шараларды қабылдамау фактісі бойынша әрекетсіздігі 2024 жылғы 27 қарашада Алексей Божковтың өтініші негізінде қаралғаны айтылды.
Нәтижесінде қала әкімі атқарып отырған қызметінен өкілеттік мерзімінің аяқталуына байланысты босатылғаны туралы жауап берілді. Дәл осы күні, 27 наурызда, бұрынғы қала басшысы Жақсылық Омар әлеуметтік желілерде өз қызметінен "өкілеттік мерзімінің аяқталуына байланысты" кеткенін айтып, жазба жариялаған еді.
Осылайша оның орнына тұрғын үй-коммуналдық шаруашылық бөлімінің басшысы тәртіптік жаза ретінде ескерту алды.
30 наурызда "Қазгидромет" Павлодар, Қарағанды, Жезқазған, Балқаш, Теміртау, Өскемен, Риддер, Семей, Алматы, Астана, Петропавл қалаларында ауа ластанып, қолайсыз метеорологиялық жағдай болуы мүмкін екенін ескерткен еді.