Orda.kz редакторы Гүлнар Бажкеноваға қатысты қылмыстық іс қозғалды

Фото: Гүлнар Бажкенованың желідегі парақшасынан

Orda.kz редакторы Гүлнар Бажкенованың кеңсесінде және пәтерінде қазір тінту жүргізіліп жатыр. Бұл туралы Stan.kz ақпарат агенттігі HALYQSTAN арнасына сілтеме жасап хабарлайды.

"Алматы қаласының полиция департаментіне түскен өтініштер бойынша ресурстың бас редакторы О азаматша Б-ға қатысты бірнеше рет әдейі жалған ақпарат тарату фактілері бойынша қылмыстық істер қозғалды.

Тергеу шаралары аясында арызданушылардың уәждері мұқият тексеріліп жатыр. Алдын ала анықталғандай, 2024 жылғы бір жарияланымда құқық қорғау органдары қызметкерін пара алған сәтінде ұсталды деген жалған ақпарат таратылған. Алайда бұл оқиғаның шын мәнінде болмағаны анықталды. Осылайша Б-ның әрекеті қоғамда аталған қызметкердің кәсіби беделі туралы жалған пікір қалыптастыруға алып келген, оның іскерлік абыройына нұқсан келтірілген.

Тағы бір жарияланымда мүліктік даудағы залалдың мөлшері мен себептері туралы бұрмаланған және дұрыс емес деректер берілген. Бұл да қоғамды адастырып, арызданушының іскерлік беделіне елеулі зиян келтірген.

Бұдан бөлек, өткен жылдардағы басқа жарияланымдар бойынша да жәбірленушілердің өтініштері негізінде тергеу жүріп жатыр. Олар да жалған және қоғамды шатастыратын мәліметтерді қамтуы мүмкін.

"Азаматша Б-ның тұрғылықты жерінде және жұмыс орнында тергеу әрекеттері жүргізіліп жатыр. Жарияланған әдейі жалған ақпараттың дайындалуы мен таралуының мән-жайын анықтау және олардың қайдан шыққанын тексеру үшін электронды құрылғылар мен материалдар алынып жатыр. Тергеу жалғасып жатыр. Барлық мән-жайлар заң аясында анықталады", – деп хабарлады полиция.

Қазақстандық тележурналист Диля Ибрагимова өмірден өтті: Халық ем үшін ақша жинап берді

Денсаулық сақтау министрі ұшақта құтқарып қалған адам танымал журналист болып шықты

Еске салайық, журналист Дана Орманбаеваға халықаралық іздеу жарияланған еді. Алматы полиция департаменті бұл ақпаратты растады. Полиция мәліметінше, Орманбаеваға қатысты "ұлтаралық араздықты қоздыру" фактісі бойынша қылмыстық іс тергеліп жатыр. "Сот "қамауда ұстау" түріндегі бұлтартпау шарасына сырттай санкция берді. Сонымен бірге күдіктіге халықаралық іздеу жарияланды” делінген хабарламада.