Оралдықтар дүкендердегі ас тұзының тапшылығына шағымданды

Фото: “Мой город”

Оралдың дүкендері, ірі супермаркеттерде және базарларда ас тұзын табу мүмкін емес болып кетті. Тұрғындар әлеуметтік желілерде бірнеше супермаркетке барғанын, бірақ өнімнің таусылып қалғанын айтып жатыр. Бұл туралы Stan.kz ақпарат агенттігі “Мой город” сайтына сілтеме жасап хабарлайды.

Жергілікті тұрғындар қарапайым тұздың өзі жоқ болып кеткеніне алаңдаулы.

"Мен үйімнің жанындағы үш дүкенге бардым – еш жерде тұз жоқ. Сатушылар бірнеше күнде ас тұзы сатылып кеткенін айтады. 2020 жыл қайтадан келгендей сезіледі", – деді қала тұрғыны Айнұр.

Тұрғын Руслан осыған ұқсас жағдайды сипаттайды.

"Мен тұз алу үшін "Дина" супермаркетіне бардым, бірақ сөрелер бос. Содан кейін орталық базарға бардым, таба алмадым. “Пешеход” деген жерге де бардым, онда да таусылып қалған. Етті тұздау үшін не істеуім керек? Мен жаңа ғана соғым әкелдім", – деді Руслан.

Алайда базардағы сатушылар тапшылықтың себебін түсірдіре алмады. 

Ал жеткізушілер Батыс Қазақстанға тұз жеткізу бір ай бұрын тоқтатылғанын айтады. Негізгі себеп – қазақстандық теміржол вагондарының жетіспеушілігі дейді. Қазан айының соңында күшіне енген жаңа тасымалдау ережелері тек жергілікті жылжымалы құрамды пайдалануды талап етеді.

Енді ресейлік Соль-Илецк теміржолы аймаққа жете алмайды, ал жергілікті қазақстандық өндірушілер аймақтың қажеттіліктерінің тек бір бөлігін ғана қанағаттандырады.

Тұрғындар алдағы күндері жағдай тұрақтанады және тұз қайтадан сөрелерде әдеттегі бағамен пайда болады деп үміттенеді.