Оңтүстік Кореяның экс-президентінің әйеліне жемқорлық және парақорлық бойынша ресми түрде айып тағылды

Фото: Getty Images

Арнайы прокурорлар тобы Оңтүстік Кореяның бұрынғы бірінші ханымы Ким Кон Хиді сыбайлас жемқорлықпен айналысты және пара алды деп айыптады. Бұл туралы Stan.kz ақпарат агенттігі Yonhap-қа сілтеме жасап хабарлайды.

Бұрынғы президент Юн Сок Ёльдің әйеліне 2009-2012 жылдар аралығында акцияларға қатысты жүргізілген айла-шарғыларды қаржыландырды және 2022 жылғы президенттік сайлау алдында ықпалды сарапшыдан сауалнама нәтижелерін заңсыз алды деген айып тағылды. Оған қоса, ол кәсіпкерлер мен діни ұйымдардан қамқорлығы үшін қомақты сыйлықтар алды деген күдікке ілінді.

Айыптау қорытындысы оның сотқа дейінгі қамау мерзімінің аяқталуына екі күн қалғанда ұсынылған. Бұл жайт оны қамауда ұстау мерзімін алты айға ұзартады.

Арнайы прокурорлар тобы Ким Кон Хиді қамауға алғаннан бері бес рет жауап алмақ болған, бірақ ол негізінен үнсіздік сақтау құқығын пайдаланған.

Еске салсақ, 13 тамызда Оңтүстік Кореяның бұрынғы бірінші ханымы сыбайлас жемқорлыққа қатысы бар деген күдікпен қамауға алынғанын жазған едік. Дегенмен 52 жастағы Ким Кон Хи тағылған айыпты жоққа шығарды. 

Айта кетейік, оның күйеуі, Оңтүстік Кореяның бұрынғы президенті Юн Сок Юль да қамауда отыр. Оған 2024 жылдың желтоқсанында қысқа мерзімді әскери жағдай енгізу арқылы бүлік ұйымдастырды және билікті асыра пайдаланды деп айып тағылуда. Бұл айыппен ол өмір бойы бас бостандығынан айырылуы немесе өлім жазасына кесілуі мүмкін.