Еңбек министрі Светлана Жақыпова Оңтүстік Корея билігінің заңсыз жұмыс істейтін 15 мыңға жуық қазақстандықты отанына қайтаруды талап еткенін мәлімдеді. Оның айтуынша, бұл екі ел арасындағы заңды жұмысқа орналастыру туралы келісімге қол қоюдың шарттарының бірі.

"Біз құжатты бекітіп, сыртқы істер министрлігі арқылы Оңтүстік Кореяға жібердік. Қазір оны Корея билігі қарастыруда. Олар бізге үш шарт қойды", – дейді Жақыпова.

Министрдің айтуынша, Оңтүстік Корея билігі қойған шарттар арасында:

- Қазақстанның Кореядағы елшілігінде жұмыспен қамту атташесі лауазымын енгізу;

- Кореяда заңсыз жүрген 15 мың Қазақстан азаматын қайтару;

- Оңтүстік Кореяға жұмыс істеуге баратын барлық қазақстандықтар үшін міндетті сертификаттауды енгізу бар.

"Ұлының денесін Оңтүстік Кореядан алып кетуге көмектеспеген": Қазақстандық әйел сотта сыртқы істер министрлігін жеңіп шықты

"Біздің тарапымыздан барлық шарттар орындалды, күту ғана қалды. Заңсыз мигранттарға реадмиссия процедурасы қолданылатын болады. Бұл сыртқы істер министрлігіне қойылатын сұрақ, егер олар өз еркімен билет сатып алып, қайтып келсе, ешқандай жауапкершілік болмайды. Әйтпесе, олар заңды жауапкершілікке тартылады, бірақ нақты қандай шаралар қолданылатыны әлі белгісіз", – дейді министр.

Министр келісімге қол қою бойынша барлық жұмыстарды жылдың соңына дейін аяқтау керектігін айтты.

"Бұл мәселемен бір жылдан бері айналысып келеміз. Орталықтар Павлодар, Өскемен, Түркістан қалаларында ашылды, бірақ Корея орталықтардың Кореяға тікелей рейстері бар қалаларда ғана орналастырылуын талап етті. Сондықтан тестілеу Алматы, Түркістан қалалары мен Алматы облысында жүргізіледі", — деді Жақыпова.

Еске салсақ, бұған дейін іздеуде жүрген қазақстандықтар Оңтүстік Кореядан елге қайтарылғаны туралы жазған едік.

Талқылау