"Олар аман-есен, менің балам өлді": Адвокат Шерзаттың анасының сөзін оқыды

Фото: Видеодан скрин

Талғардағы 16 жастағы Шерзат Полатты өлтіру ісі бойынша сотта жәбірленуші тараптың адвокаты Мейірман Шекеев марқұмның анасы Гүлбарам Бишімбиеваның сөзін оқып берді. Бұл туралы Stan.kz ақпарат агенттігі хабарлайды.

Гүлбарам Бишімбиева өз сөзінде мұндай қасіретті ешкімнің басына тілемейтінін айтқан.

"Ешбір ана мен сияқты жыламасын. Мен соттан айыпталушыларды өмір бойына бас бостандығынан айыруды, тым болмаса 20–30 жылға соттауды сұраймын. Бұл өзгелерге сабақ болады. Бұл адамдар қоғам үшін қауіпті. Олар тіпті куәгерлердің, сол үйде тұратын көршілердің көзінше істеп жатқанын ойлаған да жоқ, қорыққан да жоқ. Бұл – ерекше жауыздық. Егер сол видеожазба болмағанда, олар өздерінің оқиға орнында болмағанын айтатын еді. Олар бұрын жасаған істері үшін жауапкершіліктен құтылып жүрген соң, жазасыз қаламыз деп сенімді болды", – деді ол.

Бишімбиева бұл қылмысты аса қатыгездікпен жасалған кісі өлтіру деп есептейді.

"90-жылдары бандиттер де бұлай қатыгез болмаған шығар. Олар 16 жастағы балаға қарумен барған. Егер менің Нұрқанатым сол кезде олардың біреуіне оқ атқан болса, бәлкім, Шерзат тірі болар ма еді. Иә, оны соттар еді, бірақ ол да, Шерзат та тірі болар еді. Ешкімнің біреудің өмірін қиюға құқығы жоқ. Айыпталушыларды қанша жылға соттаса да, олар тірі. Ал менің балам өлді", – деді Шерзаттың анасы.

Адвокат сотталушылар айғақ ретінде бейнежазба бар бола тұр, өз кінәсін мойындаудан бас тартқанын атап өтті.

“Өз әрекеттерін көріп отырса да, олар тоқтамайды, өз кінәсін, қылмысын мойындамай отыр. Бұған дейін де бірнеше рет жауапкершілікке тартылғандарын ескерсек те, нәтиже жоқ. Мысалы, Белғожаев былтыр екі жылға сотталған, бірақ бұл еш нәтиже бермеген. Видеожазбада Белғожаевтың Гайыпбаевты оң аяғымен теуіп, кейін Шерзаттың басынан қарудың сабымен ұрып, бірнеше рет тепкені анық көрінеді. Аскентай өзін құрбан етіп көрсеткісі келеді, бірақ ол 2019 жылы да сотталған, бұған дейін де қылмыстық жауапкершілікке тартылған. Аскентайдың Шерзат өліміне тікелей қатысы бар. Бірақ ол бәрібір жазадан құтылып кетемін деп сенеді. Бұл бүкіл жанжалды бастаған – Дархан. Олардың өздерінің айтуынша, Дархан Каржаубайға чек көрсеткен, ал ол "Ақша түспесе де, кейін түседі" деген. Соған қарамастан, Аскентай тоқтамай, достарын шақырып, төбелесті бастап жіберген, Шерзаттың анасын балағаттай бастаған. Мұны Шерзат көтере алмаған," – деді адвокат.

Жәбірленуші тараптың қорғаушысы айыпталушыларға ең қатаң жаза тағайындауды сұрады.

"Себебі олар бұл қылмысты қасақана және ерекше қатыгездікпен жасаған. Біз баламыздан айырылдық, сондықтан моральдық және материалдық шығынды өтеу туралы талабымызды да қанағаттандыруды сұраймыз. Қорытындылай келе айтарым, бұл жерде бір ғана адамның емес, тұтас топтың кінәсі бар. Біз бұл туралы үндемей қала алмаймыз, айтуымыз керек. Осы бірнеше ай ішінде олардың кінәсін дәлелдейтін айғақтар ұсындық. Әділ шешім шығаруыңызды сұраймыз. Барлығы сіздердің қолдарыңызда. Шерзатқа құрмет білдіріңіздер," – деді адвокат.