"Жеке Бишімбаевым": Жарты жыл қысым көрсетті деген қазақстандық актрисаның күйеуі ұсталды

Фото: instagram.com/amangalieva/

Жарты жылдан бері әйеліне қысым көрсетіп, қол көтерді деген қазақстандық блогер әрі актриса Анель Аманғалиеваның күйеуі ұсталды. Ол 25 тәулікке қамауға алынған. Бұл туралы Stan.kz ақпарат агенттігі хабарлайды. 

Полиция Анель Аманғалиеваның күйеуінің қудалауына қатысты жасаған ашық мәлімдемесінен кейін алматылық кәсіпкерді ұстады. Полиция департаменті қылмыстық іс қозғалғанын хабарлады.

“Күдікті ұсталып, Қарасай ауданындағы уақытша ұстау изоляторына қамалды. Іс материалдары сотқа жолданды. Сот шешімімен ол 25 тәулікке қамауға алынды.

Бұған дейін Алматы облысының полициясына 29 жастағы әйел танысының өз еркінен тыс мессенджерлер мен мобильді қосымшалар арқылы мазалап, үздіксіз хабарламалар жібергені туралы арызданған”, – делінген хабарламада. 

Полицияның мәліметінше, бұл әрекеттер әйелге психологиялық қысым көрсеткен.

Ақпан айының басында Анель Аманғалиева Instagram парақшасында бұрынғы күйеуі тарапынан ұзақ уақыт бойы қысым, қорқыту және қудалау көргенін мәлімдеді. Айтуынша, заң жүзінде әлі некеде болғанымен, ер адам жарты жылдан астам уақыт бойы қарым-қатынасты толық тоқтатуға мүмкіндік бермеген. Жазбаларының бірінде ол жағдайды "менің жеке Бишімбаевым" деп атап, экс-министр Куандык Бишимбаев ісіне ишара жасаған. 

• Атырауда блогерді соққыға жыққандарға сот үкімі шыққанымен, түрмеге бірден бармайды

• Жетісуда 4 жасар баласын аяусыз ұрған әйелді сот психикалық ауытқуы бар деп таныды

Блогер кәсіпкер өзін интимдік суреттермен бопсалап, өміріне қауіп төндіргенін де айтты. Threads желісінде ол хат алмасу үзінділерін бөліскен. Анелдің сөзінше, өткен жылдың маусымында Грузияға барған сапарында ер адам оны ұрып, мұрнын сындырған. Дәрігерге Қазақстанға оралған соң ғана қаралған. Тексеру барысында миы мен мойын тұсына компьютерлік томография жасалып, медициналық қорытынды берілген. Мұрнының сынғанын рентген арқылы білген.

Осыдан кейін ол күйеуімен қарым-қатынасты толық үзбек болып, жұмысынан шығып, жеке ісін бастаған. Айтуынша, ер адам оның қаржылай тәуелсіз екенін түсінген соң мінез-құлқы одан әрі агрессивті бола бастаған.

Тағы бір жанжал Алматыда болған. Блогер күйеуінің басқа әйелмен хат жазысқанын көріп, айырылысуды ұсынған. Оның айтуынша, бұл әрекет жанжал мен төбелеске ұласқан. Сондай-ақ Анель Ташкент әуежайында да оқиға болғанын айтты. Онда ер адам қорқытып, телефоны мен сөмкесін тартып алып, "кейін есептесетінін" айтқан. Осыдан кейін блогер қауіпсіздігі үшін жасырынып жүргенін мәлімдеді.

Еске сала кетейік, бұған дейін актриса Анель Аманғалиева тұрмыстық зорлық-зомбылық көргенін айтқаны туралы хабарлаған едік.