Ауыл шаруашылығы министрлігі сиыр етінің қымбаттау себебін түсіндірді

Фото: freepik.com

Ауыл шаруашылығы министрлігі елде сиыр еті бағасының өсу себебін түсіндірді. Бұл туралы Stan.kz ақпарат агенттігі хабарлайды.

Ведомство мәліметінше, өндірушілерден шыққан ірі қара мал етіне көтерме бағалар өңірге байланысты 2400-3100 теңге аралығында, бөлшек саудада 3000-3700 теңге аралығында өзгеріп отырады.

"Бағаның өсуі ішкі факторларға байланысты: селекциялық-асыл тұқымдық жұмысты субсидиялау тоқтатылды, энергия ресурстары қымбаттады (электр энергиясы +11,3%, газ +15,9%, су +96%-ға дейін), жем-шөп, ЖЖМ, ветеринарлық препараттар құны артты, АӨК-дегі жалақы көтерілді, сондай-ақ жеткізу тізбегіндегі делдалдардың әсері байқалады", – делінген министрлік түсіндірмесінле.

Бұдан бөлек қазақстандық сиыр етіне сыртқы нарықта сұраныс артқанын аталып өткен.

"Қаңтар–маусым айларында экспорт көлемі 16,1 мың тоннаға жетіп, 2,4 есе өсті. Негізгі бағыттар – Өзбекстан, Тәжікстан, Қырғызстан, Қытай және БАӘ. Бұл отандық өнімнің сапасы мен бәсекеге қабілеттілігін дәлелдейді.

Қазіргі таңда бордақылау алаңдарының жүктемесі – 35–40%. Оны арттыру мақсатында 2025 жылғы 1 тамыздан бастап жылдық 5%-бен 12 айға жеңілдетілген кредиттеу бағдарламасы енгізілді. Бұл мақсатқа 50 млрд теңге бөлінді. Бағдарлама жас малды, жем-шөпті, ЖЖМ мен жабдықты сатып алуды қаржыландырады және бордақылау алаңдарының жүктемесін 60%-ға және одан жоғары деңгейге жеткізуге мүмкіндік береді", – дейді ведомство өкілдері.

Бағаның өсуіне қарамастан, қазіргі сиыр еті бағасы өндірушілер үшін әлі де табысты болып отыр екен.

"Мемлекеттік қолдау ұсыныстың қысқаруына емес, артуына ықпал етіп, ішкі нарықтың қажеттіліктерін толық қамтамасыз етуде. Осылайша ет саласындағы жағдай бақылауда және елдің азық-түлік қауіпсіздігін нығайтуға, тұрақты дамуға жаңа мүмкіндіктер ашады", – делінген хабарламада.

Министрлік таратқан дерекке сүйенсек, шілде айының соңындағы жағдай бойынша ірі қара мал басы 8,7 млн басқа жеткен, оның ішінде сиыр саны 4,5 млн-ға жетіп, 3,1% пайыз көбейген. Бұзау саны 17,9% көбейіп, 2,7 млн бас болған.

Қаңтар–шілде айларында елде 608,8 мың тонна ет өндірілсе, оның ішінде 205,7 мың тоннасы сиыр еті.

Министрліктегілердің айтуынша, бұл ішкі нарықта жеткілікті ұсыныстың бар екенін және саланың тұрақты дамуын растайды.