Батыс Қазақстан облысында оқушылар санының аздығына байланысты тағы төрт ауыл мектебі жабылады
Фото: Жасанды интеллект көмегімен жасалған
Батыс Қазақстан облысында оқушылардың жетіспеушілігінен шағын ауыл мектептері жабылып жатыр. Бұл туралы Stan.kz ақпарат агенттігі uralskweek.kz порталына сілтеме жасап хабарлайды.
Ақжайық (Ақбұлақ, Тоған, Тегісжол ауылдары) және Тасқала (Бастау ауылы) аудандарының білім бөлімдері биыл төрт ауылдағы бастауыш мектептерінің жабылатынын мәлімдеді.
Оқу-ағарту министрлігінің бұйрығына сәйкес, бастауыш мектепте кемінде 5 оқушы болуы тиіс. Негізгі мектептер – кемінде 41, ал орта мектептер – кемінде 81 оқушымен жұмыс істеуі қажет. Бұл талаптар орындалмаған жағдайда, мектептер жабылады немесе мәртебесі төмендетіледі.
Осылайша, биыл облыс бойынша тағы 12 мектептің мәртебесі төмендетіледі:
- Ақжайық, Бәйтерек, Теректі және Шыңғырлау аудандарында 7 негізгі мектеп бастауыш мектепке айналады;
- Бөкей ордасы, Жаңақала және Жәнібек аудандарында 5 орта мектеп негізгі мектепке ауыстырылады.
Бұл соңғы жылдары жалғасып келе жатқан үрдіс. 2021 жылдан бері өңірде 20 шағын жинақты мектеп жабылған. Тек өткен жылы 5 мектеп жабылған.
Билік ауыл мектептерінің жаппай жабылуының алдын алуға тырысуда. БҚО білім басқармасының басшысы Елдос Сайфуллиннің айтуынша, ауыл тұрғындарымен түсіндіру жұмыстары жүргізіліп, ауылға қайтуға шақыратын үгіт жобалары іске қосылған. Мысалы, "Қаладан – ауылға" атты пилоттық жоба аясында халықты ауылға көшуге ынталандырып, шағын елді мекендер мен жергілікті мектептерді сақтап қалу көзделуде.
Алайда, биыл тағы төрт ауыл мектебі жабылып отыр. Бұл өз кезегінде аталған ауылдардың да болашақта жойылатын елді мекендер қатарына қосылатынын білдіреді.
"Халықтың қайғысына құрметсіздік": Алматыда Лениннің есімі берілген дәмхана желі қолданушыларының ашуын туғызды
