Сыртқы істер министрлігі АҚШ-та заңсыз жүрген қазақстандықтарға кеңес берді
Сыртқы істер министрлігінің ресми өкілі Айбек Смадияров АҚШ-та заңсыз жүрген азаматтарымызға не істеу керегін айтты. Бұл туралы Stan.kz ақпарат агенттігі хабарлайды.
Фото: Pexels.com
СІМ мәліметінше, АҚШ-та жүрген 3600-ге жуық қазақстандық консулдық есепте тұр.
"Олар ресми түрде тіркелді, олардың Америка Құрама Штаттарының аумағында екені белгілі және құжаттары түгел. Ал заңсыз жүргендердің нақты санын айта алмаймыз. Болжам бойынша, олардың саны жүзден бірнеше мыңға дейін болуы мүмкін", – деді Смадияров.
Айтуынша, депортация процесі кез келген мемлекеттің көші-қон қызметінің күнделікті жұмысы.
"Депортация күн сайын болып тұрады. Егер адам иммиграциялық заңнаманы бұзса, депортацияланады. Сондықтан сонша таңғалудың қажеті жоқ. АҚШ-қа заңсыз түрде кіргісі келетін азаматтарымызға виза сұрап, заңды түрде кіруге кеңес беремін. АҚШ-тың жаңа президент әкімшілігінің саясаты бәрін қатаңдатып жатыр. Егер қандай да бір Қазақстан азаматы не басқа біреу заңсыз кіріп, кейін иммиграциялық полицияның қолына түссе, автоматты түрде депортацияланады және оған елге кіруге тыйым салынады", – деді СІМ өкілі.
Сыртқы істер министрлігінің ресми өкілі АҚШ-та заңсыз жүргендерге елден өз бетінше шығып, не жасыл карта, не виза алуды ұсынды.
Еске салсақ, бұған дейін АҚШ мигранттарға заңды қатаңдатқаны айтылды. Қазақстанның АҚШ-тағы елшілігі қазақстандықтарға ескерту жасаған еді.