Петропавлда шетел азаматы ескерткішпен суретке түскені үшін қамауға алынды (видео)
Петропавлда шетел азаматы Абай және Пушкин ескерткіштерімен суретке түскені үшін қамауға алынды. Бұл туралы Stan.kz ақпарат агенттігі хабарлайды.
Видеодан скрин
Солтүстік Қазақстан облыстық полиция департаментінің мәліметінше, 1 қаңтар күні қала тұрғындары үш жігіттің көшедегі әрекеттеріне шғымданып, полицияға жүгінген. Куәгерлердің айтуынша, жігіттер мәдениетсіздік танытып, дауыс көтеріп қана қоймай, бірі Абай мен Пушкиннің бес метрлік ескерткішіне шығып, суретке түскен.
"Петропавл ПБ жедел басқару орталығының бейнебақылау инспекторларының көмегімен үш жас жігіт ұсталды. Олардың үстінен қоғамдық орындарға мас күйінде шыққаны үшін хаттамалар толтырып, ұсақ бұзақылық фактілері бойынша да әкімшілік материал жиналды", – делінген полиция хабарламасында.
Алматыда қоғам белсендісі прокуратура ғимаратында видео түсіргені үшін қамауға алынды
Ұсталған үш жігіттің Өзбекстан азаматтары екені анықталды. Олардың біреуіне қатысты іс сотқа жіберілді.
Петропавл қаласының әкімшілік құқық бұзушылық істері жөніндегі мамандандырылған сотында 26 жастағы Өзбекстан азаматына қатысты әкімшілік құқық бұзушылық туралы іс қаралды.
Сот шетелдікті “ұсақ бұзақылық” жасағаны үшін кінәлі деп танып, 5 тәулікке қамауға алу туралы шешім шығарды.
Еске салсақ, бұған дейін Ақтаудағы ұшақ апатының салдарын дронмен түсірген блогер қамауға алынғаны туралы жазған едік.