Ержан Максим әлемдік байқауда Гран-при жеңіп алды

15 жастағы қазақстандық әнші Ержан Максим WAF CONTEST әлемдік байқауының гран-приін жеңіп алды, деп хабарлайды Stan.kz ақпарат агенттігі.

Бұл туралы жас өнерпаз Instagram парақшасында мәлімдеді.

"Ал Қазақ елі, жеңіс құтты болсын! Ең әуелі Аллаға шүкіршілік айтамын және бар дұға тілектерін жаудырып жатқан еліме, ҚазҰУ ұжымына және ректор Мұсаходжаева Айман Қожабековнаға ерекше алғысымды білдіремін. Сонымен қатар осы Македония елінің құрметті азаматы, WAF президенті Мариан Катароски мырзаға алғысымды айтамын”, – деп жазды Ержан Максим.

"WAF AWARDS" Премиясы марапатына әлемнің түкпір-түкпірінен 12 бала таңдалған. Олардың ішінде Ержан Максим де бар.

“16 елден 32 конкурсқа қатысушы бала келді, мен басында конкурсқа қатысамын деп ойлаған жоқпын, бірақ Мариан Катароски мырза "Конкурсқа қатысып, бағыңды сынап көрсеңші " деп қолқа салды, мен көп ойланбай келісімімді бердім. Мінеки, нәтижесін көріп отырсыздар”, – деп жазды ол. 

Ержан Максим Орал қаласында дүниеге келген. Бірінші арнадағы "Голос. Дети" тележобасына, сондай-ақ көптеген отандық және шетелдік вокалдық байқауларға қатысып, жүлделі орындар алған.