Соңғы жаңалықтар
Соңғы жаңалықтар

"Наурыз" ипотекалық бағдарламасының шарттары өзгереді

Қазақстанда "Наурыз" ипотекалық бағдарламасы бойынша жинақтау шегін арттыру  жоспарланып отыр. Бұл туралы Stan.kz ақпарат агенттігі хабарлайды.

Фото: Freepik.com

"Отбасы банкі" АҚ басқарма төрайымы Ләззат Ибрагимованың сөзінше, енді "Наурыз" бағдарламасына қатысу үшін депозитте ең төменгі сома 2 миллион теңге болуы қажет.

“Қазір бағдарламаға қатысу үшін депозитте 1 миллион теңге болуы қажет. Алайда конкурс жеңімпазы тұрғын үй құнының 20 пайызын қысқа мерзімде төлеуге тиіс. Талдау көрсеткендей, 2,5 мың өтінімнің тек 39 пайызы осы талапқа сай. Сондықтан депозиттегі ең төменгі соманы 2 миллион теңгеге дейін ұлғайтуды ұсынамыз. Бұл бағдарламаны жүзеге асыруды жылдамдатады", – деді ол.

Ибрагимованың сөзінше, "Наурыз" бағдарламасы бойынша келер жылы 300 миллиард теңге бөлу жоспарланған.

"Бағдарламаны 2025 жылы жалғастыру үшін 14-15 пайыздық нарықтық мөлшерлемемен 200 миллиард теңгеге облигациялар шығарамыз. 7%-ға дейін мемлекеттік субсидиялар арқылы бөлінеді. 24 қаңтарда бюджеттен 8,1 млрд теңге бөлуді сұраймыз. Келесі жылы бағдарламаны сәтті жүзеге асыру үшін бұл процесті жеделдетуді ұсынамыз. Өйткені ол жас отбасылар арасында сұранысқа ие", – деді Ибрагимова. 



Сондай-ақ Ибрагимова бағдарламаға талдау жүргізу кезінде 2 мәселе анықталғанын мәлімдеді. 

"Бірінші мәселе – көптеген сатып алушылар жөндеу жұмыстары жүргізілген дайын тұрғын үйді сатып алуды жөн көреді, себебі жөндеу шығындары айтарлықтай көп болады. Осыған байланысты банк Құрылыс компаниялары қауымдастығымен бірқатар кездесулер өткізді. Енді порталда тұрғын үйлер дайын күйінде орналастырылады, ал сатып алушылар оны 10 пайыздық бастапқы жарна төлеп ала алады. Бұл өзгеріс 2025 жылдың 1 қаңтарынан бастап күшіне енеді", – деді Отбасы банк төрайымы.

Оның айтуынша, қазір Солтүстік Қазақстан, Павлодар, Қызылорда және Атырау облыстарында баспана тапшылығы байқалады.

Банк мәліметінше, 2024 жылдың басынан бері бастапқы тұрғын үй сатып алуға 571,7 миллиард теңгеге 32,8 мың несие, оның ішінде мемлекеттік бағдарламалар бойынша 94,6 миллиард теңгеге 7,8 мың несие берілген.

Банк өз бағдарламалары бойынша 477,1 миллиард теңгеге 25 мыңнан астам несие берді.

Оның 40 пайызы "Наурыз" және "Отау" бағдарламалары бойынша, яғни 240 миллиард теңгенің 9,3 мыңы несие. 

Айта кетейік, бұған дейін "Наурыз" және "Отау" ипотекалық бағдарламаларының қатысу шарттары өзгергені туралы жазған едік. 

Талқылау