Министр Абу-Даби ғимаратындағы дауға қатысты түсініктеме берді
ҚР еңбек және әлеуметтік қорғау министрі Тамара Дүйсенова “Абу-Даби Плаза” кешенінде азаматтарды жаппай жұмыстан шығаруға қатысты түсініктеме берді. Министр жұмыстан шығарылған 400 жұмысшының ендігі жағдайы не болатынын айтты.
Бұл туралы Sputnik Қазақстан хабарлады.
“Жұмысшылары наразылық білдірген 4 компания үшін құрылыс пен қосымша жұмыс көлемі белгіленді. Енді сол жұмыс аяқталып отыр. Келісімшарт бекіткен кезде жұмыс мерзімі де белгіленеді. Қазіргі таңда компания басшылары еңбек инспекторларына жұмысшыларына жоспарланған жұмыс көлемі аяқталып жатқанын алдын ала хабарлағандарын мәлімдеді. Абу-Даби Плазадағы төрт мекеме жұмыскерлеріне алдын ала ескерткен. Қазір жергілікті атқарушы органның еңбек инспекциясы тобы оқиға орнына аттанып, жұмыс берушілермен сөйлесті. Біріншісі, олар жұмысшыларға жұмыс көлемі бекітілген келісімшартқа сәйкес аяқталғаны туралы хабарландыру беретін болды. Орташа жалақы көлемінде өтемақы төленеді. Қазір осындай уағдаластыққа қол жетті”, — деді Дүйсенова.
Министрдің айтуынша, Астанадағы ең биік ғимараттың құрылысына 11 компания іске қосылған, соның 4-еуінің жұмысшылары наразылық бідірді. Жергілікті еңбек инспекциясының мәліметінше, 62 жұмысшы хабарландыру алған.
“Еңбек кодексінде нақты көрсетілген: кәсіпорынның экономикалық жағдайының нашарлауына байланысты азаматтар жаппай жұмыстан шығарылса, екі айлық жалақы қарастырылған. Егер біріншіден, бұл жұмыс көлемінің азаюына және екіншіден, бұл туралы еңбек келісімшартын бекіткен кезде айтылса, онда бұл жұмыс көлемі орындалғаннан кейін жұмыстан шығару деп саналады және өтемақы ретінде бір айлық жалақы төленеді”, — деді министр.
Еске салып өтсек, елордада салынып жатқан “Абу-Даби Плаза” кешенінің жұмысшылары наразылыққа шықты. БАҚ-тың хабарлауынша, құрылыс алаңында істейтін 400-ге жуық адам бір күнде жұмыссыз қалған. Құрылыс компаниялары алдын ала ескертпей, өтемақы төлемейтінін де ашық айтқан көрінеді.
Астанадағы Абу Дабиді жергілікті жұмысшылармен қатар шетелдік құрылысшылар да салып жатыр. Бірақ, жаппай жұмыстан қуу туралы тосын бұйрық тек Қазақстан азаматтарына қатысты. Далада қалған жұмысшылар болса, құрылыс компаниялары тиісті өтемақыны төлегенше тыным таппаймыз деп отыр.
Дүйсенова еңбек инспекциясының жұмысы аяқталғаннан кейін, қосымша ақпарат хабарланатынын атап өтті.
Тағы оқыңыз:
Ақмола облысында екі отбасы оралманның жалға беріп кеткен үйіне таласып жатыр
Алматыда 23 жастағы әйел дәрігерге кетіп, үйіне оралмаған
Астанадағы ең биік ғимарат құрылысшылары наразылыққа шықты
Қарағанды облысында үйі өртеніп кеткен отбасы жерлерінен айырылуы мүмкін