КСРО және Қазақстанның еңбек сіңірген әртісі 1939 жылдың 11 шілдесінде, Семей облысы, Көкпекті ауылында дүниеге келді. Болашақ актрисаның әкесі Мәжит Мұхамедияров байланыс басқармасында пошта бастығы қызметін атқарған, ал анасы Меңсұлу сатушы болып жұмыс істеген.

Раиса Мұхамедиярова — Абылай хан атындағы Қазақ Халықаралық Қатынастар және Әлем Тілдері Университетінің түлегі. Кино әлеміне қадам баспай тұрып ол 1957-1958 жылдары Қазақстан Компартиясы Сарыағаш аудандық комитетінде хатшы-машинисті болған. Арада екі жыл өткен соң ғана "Қазақфильм" киностудиясының актрисасы атанған.

Ол кино әлеміндегі жолын 1961 жылы шыққан "Песня зовет" фильмінде басты рөлді сомдаудан бастады.Мұхамедиярованың бағы 1963 жылы "Менің атым Қожа" атты фильміне түсіп, Хадиша Майқанованың рөлін мінсіз сомдаған соң жанды. Халықтың ықыласына бөленіп, ел сүйген актриса атанғаннан кейін ол 1964 жылы 25 жасында 60 алқымдаған жазушы Ғабит Мүсіреповке күйеуге тиіп, сегіз жыл бір шаңырақтың астында тұрды. Ол Сергей Азимовтың "Поздняя любовь классика" деректі фильміне берген сұхбатында Мүсірепов оның киноға түскенін қаламағанын айтты.

"Біз Сұлтан Қожықовпен "Қыз Жібектің" сценариін жазатын болдық", - деді маған. "Мен түсемін бе?" деп сұрағанымда, "Түсесің", - деді маған. Мені актерлік сынамаға шақыратын күнді күтіп жүрдім. Артынша сынаманың біткенін естіп, жан дүниемде іштей дискомфорт пайда болды. Мені сатып кеткендей сезім болды. Ал мен сатқындықты жек көремін. Осыдан кейін арамыз жылымай-ақ қойды", - дейді актриса.

Актриса жазушыға Гауһар және Гүлнар есімді екі қыз туып берді. Ол 80 жылдық ғұмырында актриса 30-ға жуық фильмге түсті. 2002 жылға дейін Ғ. Мүсірепов атындағы Қазақ мемлекеттік академиялық балалар мен жасөспірімдер театрында жұмыс істеген. Раиса Мұхамедиярова 80 жасында қайтыс болды.

Раиса Мұхамедиярованы ақтық сапарға шығарып салу рәсімі 7 қараша күні, сағат 10:00-де Ғ.Мүсірепов атындағы Қазақ мемлекеттік балалар мен жасөспірімдер театрында болады.

Тағы оқыңыз: Қазақ әдебиетінің інжу-маржаны Ғабит Мүсіреповтің өмірбаяны

Талқылау