"Ақ Жайық" басылымының жазуынша, 3600 грамм салмақпен аман-есен дүниеге келген нәресте қазір атасы мен әжесінің қолында, ал марқұм келіншектің қалған үш ұлы әкесімен бірге тұрады.

41 жасында әйелінен айырылып қалған Самалбек Бегалиев марқұмның өліміне дәрігерлер кінәлі дейді. Самалбектің өзі учаскелік полиция инспекторы қызметін атқарады. Гүлдана екеуінің тұңғышы бүгінде 18-ге толған. Мектеп бітірген соң Ақтөбедегі медицина институтына түскенімен, анасы қайтыс болған соң оқуын тастап, әкесіне көмектесу үшін үйіне оралған. Қазір де үлкен ұлы қалалық мейрамханалардың бірінде жұмыс істейді. Ал қалған үшеуі әлі кәмелеттік жасқа толмаған: екіншісі 14-те, үшіншісі 6-да, ал ең кішісі әлі 10 айға толмаған.

Бүгінде аталған қайғылы оқиғаға бір дәрігер күдікті деп танылғанымен, Самалбек келіншегінің өліміне бір емес, бірнеше адамның кінәлі екеніне сенімді. Ол дәрігерлердің келіншегін босандыру кезінде ішінен аяусыз басып екі қабырғасын сындырып жібергеніне сенімді.

Самалбек әйелінің толғағы 17 қаңтар күні таңғы сағат 5.00-де үйде басталғанын айтады. Келіншегі таңға жуық оятып, екеуі жедел жәрдем шақырады, артынша кезекші дәрігерлер Гүлдананы аурухананың модульдік бөліміне жеткізеді, өйткені оған дейін келіншектің ПТР-тесті коронавирусқа оң нәтиже көрсеткен екен.

"14 қаңтарда әйелімнің ұялы телефонына СМС-хабарлама келіп, оның ПТР сынамасы оң нәтиже көрсеткенін хабарлады. Ауру белгілері болмағандықтан, әйелім учаскелік дәрігерге хабарласып, қайтадан тест тапсырғысы келетінін айтқан. Учаскелік дәрігер мобильді топ келіп, отбасы мүшелерін 14 күндік карантинге жауып тастайды дегенімен, сол күйі ешкім келмеген. Ал облыстық жұқпалы аурулар ауруханасында тексерілгеннен кейін олар коронавирус жоқ деген", - дейді Самалбек Бегалиев.

17 қаңтарда әйелі төртінші ұлын аман-есен дүниеге әкелді. Қуанышты хабарды сол күні телефон арқылы күйеуіне хабарлап, "Сәке, мен босандым, ұлды болдық!" деген.

"Мен қуанып, әйелімді құттықтадым да, сағат 23.00-де тағы қоңырау шалдым, бірақ ол қатты күйзеліп, жылап жатыр екен. Мен ештеңеден күдіктенбестен, оны жұбатып, бәрі жақсы болатынын айттым. Келесі күні таңғы 9.00-де қоңырау шалып едім, жауап бермеді. Содан дереу ауруханаға бардым, ол жерде әйелімнің көп қан жоғалтқанын, түнгі сағат 3.00-де жансақтау бөліміне түскенін білдім. 18 қаңтар күні кешкі уақытта маған әйелімнің қайтыс болғаны туралы хабар берді", - дейді марқұмның күйеуі.

Сот-медициналық сараптамада келіншек асқынған геморрагиялық шок жағдайында ұйқы безінің, көкбауыр артериясы мен тамырының жарылуы салдарынан ішке қан кетуі себепті көз жұмған деген қорытынды берген.

“Әйелім қайтқалы таңға дейін ұйқы жоқ. Бір-екі сағатқа ғана көзім ілінеді. Таңғы 7-де тұрамын да балаларымды жуындырып-шайындырып, сабақтарына жіберемін, сосын өзім жұмысқа кетемін. Күні кеше ғана биыл 1 қыркүйекте бірінші сыныпқа барған 6 жасар ұлым түнде оянып, "мамам үйге қашан келеді?" деп сұрады. Не айтарымды білмедім. Өте қиын, - деп бір көңілі босап алды Самалбектің.

“Қолымнан келгенше орнын жоқтатпауға тырысып жатырмын. Балалардың тамағын пісіріп, киімдерін жуамын, сабаққа дайындаймын. Өзім жұмыстан түнгі сағат 11-12-лерде келемін. Мені үйде балаларым кешкі асын ішпей, күтіп отырады. Кейде әзірлеген тамақтарым піседі, кейде шикі піседі, күйіп кетеді. Сосын тамақтарды көбінесе сатып аламын. Қазір қайта ағамның қызы ауылдан келіп, көмектесіп жүр”, – дейді ол.

Самалбектің айтуынша, ол әйелінің бейітінің басына да жиі барып тұрады.

"Әйеліме мұңымды шағамын, сосын өзіммен-өзім сөйлесіп отырғанымды түсініп, есімді жиып, кері үйге, балалардың жанына келемін" дейді.

Гүлдананың әке-шешесі де қыздарының қазасы дәрігерлердің қателігінен болғанын және тергеу ісінің жан-жақты қаралмай отырғанын айтады. Ал анасы Светлана Сарузенова қызының жүктілігі қалыпты өткенін, денсаулығына шағымы болмағанын жеткізді.

Қызым босанған күні күйеу балам "сүйінші, қызыңыз жеңілденді" дегенде, мен өзім қызыма соқтым. Сонда қызым, "мама-ау, қиналдым-ау, қиналдым" деп қайталап үш рет айтты. Басқа еш нәрсе айтпастан, соңғы рет қоштасқаным екен қызыммен. Өзі босана алмай қиналса, неге кесір тілігін жасамады, неге қызымды әбден қинады? – дейді Светлана Сарузенова қайғыдан қан жұтып. Содан соң көзіне көз жасына ерік берді:

“Қызымның маған тастап кеткен аманаты ғой. Осыны өсіріп, әкесінің қасына жетектетіп жіберсем деп отырмын. Балалары өсіп, әкесіне тірек болсын. Ден сау болса, өсіреміз ғой”, – деді сөз соңында.

Облыстық денсаулық сақтау басқармасы өкілдері де Гүлдана Хинатулланың 18 қаңтарда модульдік ауруханада қайтыс болғанын хабарлады. Науқас бір күн бұрын толық жүктілік мерізімен және коронавирусқа ПТР сынамасының оң нәтижесімен ауруханаға түскенін растады.

"Сол күні келіншек босанып, палатаға ауыстырылды. Түнде жағдайы нашарлаған соң оны кезекші дәрігер қарап, қажетті ем тағайындаған. Бірақ жағдайы жақсармағандықтан, таңертең кезекші реаниматолог және гинеколог әйелді тексеріп, жансақтау бөліміне жатқызды. Науқастың ішіне қан кету мүмкін деген күдікпен қосымша акушер-гинеколог, хирургтер бригадасы шақыртылып, операцияға жатқызылды. Операция кезінде оған "іштің жабық жарақаты, ұйқы безінің зақымдануы" деген диагноз қойылды. Емдеу хаттамасына сәйкес медициналық көмек көрсетілді. Бірақ науқастың жағдайы жақсармады, оған екінші ота жасалғанымен, ол 2022 жылдың 18 қаңтарында қайтыс болды", - делінген басқарма хабарламасында.

Аталған дерекке қатысты Атырау облыстық полиция департаментінің өкілдері де пікір білдіріп, жас ананың өлімі фактісі бойынша ҚР Қылмыстық кодексінің 317-бабының 3-бөлігімен (Медицина қызметкерінің адам өліміне әкеп соқтырған кәсіби міндеттерін тиісінше орындамауы) қылмыстық іс қозғалғанын айтты.

Қазір тергеу амалдары жүргізіліп жатыр.

Талқылау