Көлік сатып алмақ болған: Қазақстандықтан Қытай шекарасында 37 мың доллар тәркіленді
Қытайдан көлік сатып алу үшін шекарадан қомақты қаржы алып өтпек болған қазақстандыққа 4,5 миллион теңге айыппұл салынып, мемлекет пайдасына 47 300 доллар тәркіленді. Бұл туралы Stan.kz ақпарат агенттігі хабарлайды.
Фото: drive2.ru
Жоғарғы соттың мәліметіне сенсек, кеден заңына сәйкес азамат 10 мың доллардан аспайтын ақша алып жүруге құқылы. Осы шектен асатын сомалар міндетті түрде жазбаша декларациялануға жатады.
"Жетісу облысының Панфилов аудандық соты тасымалданған қаражатты рұқсат етілген мөлшерден асырып жіберген құқық бұзушыға қатысты әкімшілік іс материалдарын зерттей келе, оның осы соманың жартысы екі досқа тиесілі екені туралы түсініктемелерін есепке алмаған. Себебі ол туралы дәлел ұсынылмаған. Құқық бұзушының кінәсі әкімшілік құқық бұзушылық туралы хаттамалармен, тауарларды және олар бойынша құжаттарды ұстау актілерімен, түсіндірмелермен, кедендік тексеру хаттамаларымен, бейне жазбалармен және басқа да іс материалдарымен расталады", – делінген хабарламада.
Сот құқық бұзушының кінәсін мойындамауын қорғау және әкімшілік жауапкершіліктен жалтару құралы ретінде қарастырды.
"Сот куәлардың айғақтарына сыни көзқараспен қарады. Өйткені олар құқық бұзушыны әкімшілік жауапкершіліктен босатуды көздеген. Сондай-ақ қаражатпен ұсталған күннен бастап іс сотта қаралғанға дейін куәгерлердің ешқайсысы өздерінің мүліктік құқықтары мен мүдделерінің бұзылғаны туралы билік органдарына немесе сотқа шағым түсірмеген. Құқық бұзушының рюкзактарынан 47 300 доллар табылғаны дау туғызбайды. Жеңілдететін немесе ауырлататын мән-жайлар анықталған жоқ", – деді Жоғарғы сот.
Ұлттық банктің мәліметінше, заңбұзушылық кезінде доллардың бағамы 484,19 теңге болған. Құқық бұзушылықтың сипаты мен белгіленген мән-жайларды ескере отырып, құқық бұзушы Әкiмшiлiк құқық бұзушылық туралы кодексінің 551-бабының 3-бөлігімен (Тауарларды, қолма-қол ақша қаражатын, ақша құралдарын декларацияламау немесе анық емес кедендік декларациялау, кедендік құжаттарда мәліметтерді анық емес мәлімдеу) кінәлі деп танылды. Оған әкімшілік жаза – мемлекет пайдасына 37 300 АҚШ доллары тәркіленіп, 4,5 миллион теңге айыппұл салынды.
Міндетті декларациялау шегінен аспайтын 10 000 доллар құқық бұзушыға – иесіне қайтарылды. Қаулы заңды күшіне енген жоқ.
Еске салайық, бұған дейін әуежайда есірткіні жаңа жылдық сыйлық ретінде өткізбек болған әйел ұсталғанын жаздық. 29 жастағы әйел есірткіні жаңа жылдық сыйлықтар ретінде ораған. Алайда кеденшілер оны ұстап қалды. Олар контрабандашы әйелмен сұрақ-жауап жүргізген. Оның жол сөмкесін тексеріп, ішінен тыйым салынған заттарды тапты. Окленд әуежайының кеден қызметінің есептеуі бойынша тәркіленген есірткінің қара нарықтағы құны 3,8 миллион жаңа зеландиялық доллар (229 миллион рубль) болуы мүмкін. Кейін канадалық әйел қамауға алынды.