"Мектепке каникулдан кейін келмеген": Қостанай облысында 8 жастағы бала соққыға жығылды
Қостанай облысы Лисаковск қаласында 8 жастағы балаға дене жарақатын салу фактісі бойынша сотқа дейінгі тергеу басталды. Бұл туралы Stan.kz ақпарат агенттігі Astana TV арнасына сілтеме жасап хабарлайды.
Фото: Instagram/ilovekostanayy
"3 сәуір күні баланың мектепке каникулдан кейін келмегені туралы ақпарат тіркелген. Осыдан кейін балаға қатысты зорлық-зомбылық белгілері анықталып, іс полиция қарауына берілді", –делінген материалда.
Қостанай облыстық полиция департаментінің мәліметінше, қазіргі уақытта барлық қажетті тергеу шаралары жүргізіліп жатыр. Сұрақ-жауаптар алынып, сот-медициналық сараптама тағайындалды.
Баланың денсаулығы мен қауіпсіздігін қамтамасыз ету мақсатында, ювеналды полиция қызметкерлері оны арнайы әлеуметтік қызметтерді қажет ететін балаларды қолдау орталығына орналастырды. Қазір бала биологиялық әкесімен бірге екені хабарланды.
Еске салсақ, бұған дейін Семейде бір топ оқушы қатарластарын аяусыз ұрып-соққаны туралы жазған едік. Оқушыны аяусыз ұрып-соққан жасөспірімдер арнайы мектепке жіберілді. Сондай-ақ осы оқиғаға байланысты мектеп директоры қызметінен босатылды.