Мас күйде оқтаумен ұрған: Атырауда әйелін қыздарының көзінше өлтірген ер адам 10 жылға сотталды

Фото: Ru.freepik.com

Атыраудың Балықшы шағынауданында тамыз айында қызғаныштан екі қызының көзінше әйелін ұрып өлтірген 41 жастағы Тимур Кабдрахитовқа сот үкімі шықты. Бұл туралы Stan.kz ақпарат агенттігі “Ақ Жайық” порталына сілтеме жасап хабарлайды. 

Сот анықтағандай, сол күні 41 жастағы ер адам ішімдік сатып алып, үйге келген. Мас күйде болған ол әйелін қызғанған. Ер адам әйелінің телефонын тексергеннен кейін ерлі-зайыптының арасында жанжал шыққан. Бір сәтте әйел басқа бөлмеге кетіп, ұйықтап қалған.

Кейін ер адам ас бөлмеге кіріп, қамыр жаятын оқтауды алып, әйелі жатқан бөлмеге кірген. Айыпталушы оны бірнеше рет басынан ұрған. Ауыр жарақаттар салдарынан әйел сол жерде, есін жимастан көз жұмған.

Іс Атырау облысының қылмыстық істер жөніндегі мамандандырылған ауданаралық сотында қаралды. Ер адам әйелін өлтіргені үшін кінәлі деп танылып, 10 жылға бас бостандығынан айырылды. Ол жазасын жалпы режимдегі колонияда өтейді. 

Қайғылы оқиға болған сәтте пәтерде ерлі-зайыптылардың 6 және 12 жастағы қыздары болған. Үлкен қызы оқиғаны өз көзімен көрген. Кейін оған психологиялық көмек қажет болып, кәмелетке толмағандарды бейімдеу орталығы көмек алды.

Көзімен мүгедектігі бар әжесі денсаулығына байланысты немерелерін өз қолына ала алмады. 

Тергеу және сот кезінде тағы бір тың дерек анықталды: әйелінің көз жұмғанын түсінгенде Тимур Кабдрахитов полиция мен жедел жәрдем шақырудың орнына екі қарындасын шақырған. Кейін олардың біреуі оқиға орнына жедел қызметтерді шақырған.