Маңғыстау әкімі 12 сағат бойы 200-ден астам тұрғынды қабылдады

5 желтоқсан күні Ақтауда Маңғыстау облысының әкімі Нұрдәулет Қилыбай тұрғындармен есептік кездесу өткізіп, онда қаланың дамуына қатысты өзекті мәселелер талқыланды. Кездесу 14:00-ден 19:00-ге дейін жалғасып, халықпен ашық диалогқа арналған маңызды алаңға айналды. 

Алайда әкімнің жұмысы мұнымен аяқталған жоқ. Есептік кездесуден кейін Нұрдәулет Қилыбай азаматтарды жеке қабылдауға кірісіп, бұл қабылдау таңғы 07:15-ке дейін – 12 сағаттан астам уақыт тоқтаусыз жалғасты. Мұндай формат өңір тарихындағы ең ұзақ қабылдаулардың бірі болды және әкімнің әрбір тұрғын үшін қолжетімділік пен ашық диалогқа деген ұстанымын көрсетті.

Түнгі қабылдау барысында Ақтаудың 200-ден астам тұрғыны облыс басшысына тікелей жүгіну мүмкіндігін алды. Көтерілген мәселелер тұрғын үймен қамтамасыз ету, жер телімдерін бөлу, үлестік құрылыс, жұмыспен қамту, әлеуметтік қолдау, медициналық инфрақұрылымның жағдайы, білім беру, кәсіпкерлік, коммуналдық тарифтер және өңірлік құрылымдардың назарын талап ететін басқа да көптеген тақырыптар болды.

Әрбір өтініш мұқият әрі егжей-тегжейлі тыңдалды. Нұрдәулет Қилыбай ешбір мәселе назардан тыс қалмайтынын атап өтті. Кейбір мәселелер сол жерде дереу шешіліп, тиісті қызметтерге тапсырмалар берілді.

Ал талдау мен ведомствоаралық өзара іс-қимылды қажет ететін мәселелер нақты мерзімдері мен жауапты орындаушылары көрсетіліп, салалық облыстық басқармалар мен Ақтау қаласының әкімдігіне жолданды. Әсіресе әрбір өтініш берушінің өмірлік жағдайын ескеретін жеке көзқарасқа баса назар аударылды.

Облыс әкімі мұндай формат тек жеке өтініштерді шешуге ғана емес, сонымен қатар кешенді шешімді талап ететін жүйелі проблемаларды анықтауға мүмкіндік беретінін айтты. Оның сөзінше, мемлекеттік органдардың ашықтығы, жариялылығы және халықпен тұрақты кері байланыс – өңірдің орнықты дамуы мен тұрғындардың өмір сапасын арттырудың басты шарттары.

Таңға дейін созылған азаматтарды жеке қабылдау Маңғыстау облысы басшылығының халыққа қызмет ету қағидаттарына беріктігін айқын көрсетіп, тұрғындармен диалог мемлекеттік құрылымдардың жұмысындағы басты құрал болып қала беретінін дәлелдеді.