"Мамыр айында төселген брусчатка тамызда қайта жасалған": Алматылық тұрғын оқу жылы қарсаңындағы қолайсыздыққа шағымданды
Фото: Әжікенованың желідегі парақшасынан
Әжікенова есімді желі қолданушысы Алматыда мамырда айында төселген брусчатканың 14 тамызда қайтадан ауыстырылып жатқанын байқағанын айтты. Алайда 25 тамызға дейінгі аралықта айтарлықтай өзгеріс болмаған. Оның сөзінше, жаңа брусчатка бұрынғысынан еш айырмашылығы жоқ. Жаңа оқу жылы басталуына байланысты бұл учаскенің дер кезінде аяқталмауы тұрғындарға қолайсыздық туғызған. Осы мәселеге қатысты Stan.kz Алматы әкімдігінен ресми түсініктеме сұрадық.
Алматылық әйел бұған дейін тас төсеуішінің төселгеніне қатысты жазба жариялағанын айтты.
"14 тамыз күні жазба жариялаған едім. Мамыр айында төселген (айда қателесуім мүмкін) жаңа брусчатка қайтадан тамыз айындағымен ауыстырылып жатыр деп. Ал бүгін 25 тамыз, яғни 11 күн өтті. Осы уақыт ішінде жағдай өзгерді деп ойлайсыздар ма? Естеріңізге саламын, астындағы жерді тегістемей, брусчатканы қайта төсеп жатыр. Ал ескі брусчатка жаңа брусчаткадан еш айырмашылығы жоқ секілді. Себебі түсі де, пішіні де, көлемі де бірдей, тіпті ажырата алмайсың", – деп шағымданды Әжікенова есімді оқырман.
Тұрғын @openalmaty-ға өтініш жолдап, ескі брусчатка мен жаңасының айырмашылығы неде екенін, мердігер жұмысты қашан тапсыруға тиіс екенін сұрады. Сонымен бірге ол жаңа оқу жылы басталатынын, дәл осы аумақтан оқушылар мен ата-аналардың күнделікті жүретініне назар аударуды талап етті.
Осы орайда Алматы әкімдігі 11 күн ішінде неліктен Бектұров пен Ганди көшелері арасындағы бөлік аяқталмағанына жауап берді.
"Бұл жұмыстар жеке меншік нысан, бұрынғы "Рамстор", қазіргі "Samal Mall" сауда кешенінің аумағында, өздерінің бастамаларымен және қаражаты есебінен жүргізілген. Сауда кешенінің мәліметінше, мамыр айында көгалдандыруды қамтамасыз ету мақсатында автоматты суару жүйесін орнату үшін уақытша жер қазу жұмыстары атқарылған. Қазір Бектұров, Назарбаев, Жолдасбеков көшелерінің бойында аумақты қалпына келтіру және брусчатка төсеу жұмыстары жүргізіліп жатыр. Сонымен қатар өз жұмыстарында сыртқы жарықтандыру, көгалдандыру және өзге де абаттандыру шаралары қарастырылған", – деп пікір білдірді әкімдік.
Жұмыстардың толық аяқталуы 2025 жылдың қазан айының соңына дейін жоспарланған дейді Алматы әкімдігі.
Еске салайық, бұған дейін Алматыда соңғы жылдары төселген сапалы брусчатканың қайта алынуы қоғамда дау туғызды. Қоғам белсендісі Санжар Боқаев алынған плиткалардың қала сыртына әкетіліп, жеке аулаға түсіріліп жатқанын видеоға түсіріп, мұны “ұрлық, бюджет қаржысын талан-таражға салу” деп бағалады. Оның айтуынша, жобаға 490 миллион теңге жұмсалғанымен, плиткалар сапалы күйінде болған және ауыстырудың қажеті жоқ еді. Боқаев бұл істі бұрынғы әкім Ерболат Досаевтың жоспары деп мәлімдеді.
Алматы әкімдігі бұған жауап беріп, Уәлиханов бульварындағы төсеуіш 20 жылдан бері қолданылып келгенін, техникалық тұрғыда ескіргенін және толық ауыстыруды қажет еткенін айтты. Сондай-ақ 500 млн теңгенің ішінде басқа нысандар да қамтылғанын, ал алынған материалдың бір бөлігі мұқтаж отбасына берілгенін, қалғаны мердігердің қоймасында сақтаулы екенін хабарлады. Оқиға қоғамда үлкен резонанс тудырып, билік пен мердігердің әрекеті ашық сынға ұшырады.
Әкімдік қаладағы ескі брусчаткалардың мұқтаж отбасыға берілгенін айтты: Алайда Боқаев төсеуіштің жеке қолға сатылып жатқанын түсіріп алған (видео)
