Лауазымын асыра пайдаланған деп сотталған Біртановтың адвокаты апеляциялық шағым түсірді

Бұрынғы денсаулық сақтау министрі Елжан Біртановтың адвокаты клиентіне қатысты шыққан сот үкімінің үстінен шағым түсірді деп хабарлайды Stan.kz ақпарат агенттігі KTK телеарнасының хабарына сүйеніп. 

“Үкім шығарған соттың үстінен заңға сай шағым түсірдік. Біз Елжан Біртанов лауазымын асыра пайдаланды дегенге келіспейміз. Қазір үкімді оқып жатырмыз, онда 67 бет бар екен. Мен өзім ол жерден қорғаушы тарап айтқан және сот жоққа шығарған дәлелдерді таба алмадым”, – дейді адвокат. 

Оның сөзінше, жақында экс-министрдің өзі де апелляциялық шағым түсірмекші. Оның 14 қарашаға дейін уақыты бар. 

Еске сала кетейік, 28 қазанда Астанадағы Сарыарқа ауданының соты бұрынғы шенеуніктің бас бостандығын бес жылға шектеген еді. Оған себеп – “Біртановтың министр болғанда лауазымын асыра пайдалануы”. Оған қоса, экс-министр мен оның орынбасарына 1 миллиардтан астам теңге көлемінде айыпұл салынды. Біртанов барлық айыпты жоққа шығарды.

Сот үкімі күшіне енбегендіктен, қазір ол үйқамақта отыр.