Күйеуін өлтіру үшін киллер жалдаған қазақстандық әйел мен сыбайласына сот үкімі шықты

Фото: uralskweek.kz

БҚО-да күйеуін өлтіру үшін киллер жалдаған әйел мен сыбайласына сот үкімі шықты. Бұл туралы Stan.kz ақпарат агенттігі хабарлайды. 

Күдіктілер Эльвира Еркебаева мен Максим Кузнецовтің ісі бойынша сот процесі 2024 жылдың тамызында басталған.

Тергеу нұсқасына сәйкес, Эльвира Еркебаева бұрынғы күйеуі Ербол Еркебаевты өлтіру үшін екі миллион теңгеге киллер жалдаған. Қылмысты ұйымдастыруға 33 жастағы Кузнецов көмектескен, ол тапанша сатып алып, ер адамды өлтіруі тиіс болған. Абырой болғанда, қылмыс тек жоспар күйінде қалған.

Сот барысында Ербол Еркебаевтың 20 жыл бойы әйеліне психологиялық қысым көрсетіп, оны қудалап, қорлап келгені белгілі болды. Сонымен қатар сотта бірнеше рет сөйлеген Ербол өзін жәбірленуші ретінде есептемейтінін және бұрынғы әйеліне қарсы ешқандай талап-арызы жоқ екенін айтқан. 

Павлодарда ер адам бұрынғы әйелін өлтіру үшін киллер жалдаған

Әйел 12 жастағы қызын өлтіру үшін киллер жалдаған

Сот қылмыстық істі “аса ауыр қылмысқа дайындалу” бабы бойынша қараса да, алқабилер күдіктілерді мүлде басқа бап бойынша кінәлі деп тапты. 

Еркебаева мен Кузнецов алқабилерінің үкімімен қылмыстық кодекстің “адамдар тобының алдын ала сөз байласуымен атыс қаруын заңсыз иемдену” бабы (287-баптың 4-бөлігі) бойынша кінәлі деп танылды. 

“Сот жаза тағайындау кезінде жас балаларының болуын, ішінара шын жүректен өкінуін, жәбірленушінің құқыққа қарсы әрекетін жеңілдететін мән-жайлар ретінде таныды. Сот заң талаптарын негізге ала отырып, Е және К-ға 3 жыл бас бостандығынан айыру жазасын тағайындап, бұл жаза шартты деп танылды”, – делінген сот хабарламасында. 

Үкім заңды күшіне енген жоқ.

Еске салсақ, бұған дейін Батыс Қазақстан тұрғыны бұрынғы күйеуін өлтіру үшін киллер жалдағаны туралы жазған едік.