Қостанайда үш жасар бала магнит жұтып қойса да, дәрігерлер ота жасамаған: Бүлдіршін көз жұмды
Қостанайда үш жасар баланың өлімінен кейін дәрігерлерге қатысты қылмыстық іс қозғалды. Бұл туралы Stan.kz ақпарат агенттігі “Время” басылымына сілтеме жасап хабарлайды.
Фото: pixabay.com
Шілде айында Қостанай облыстық балалар ауруханасында құрсақ қуысындағы магниттерді алу отасы жасалған. Үш жасар бала отадан кейін көз жұмды.
"Біз баланың асқазанынан жеті магнитті алып тастадық, бірақ үшеуі ішекке түсіп кетті. Емдеу тәсілі бойынша магниттің табиғи жолмен шығуын күту керек. Балаға жүйелер орнатылып, ішек қызметі ынталандырылды. Дегенмен рентген түсірген кезде магниттердің орнынан қозғалмағаны анықталды. Бір күн бұрын бала өзін жақсы сезініп, қозғалып, ойнап жүрді. Артынша магниттердің ішектің бір бөлігін тесіп, перитонит басталғаны анықталды. Біз магниттерді алып тастадық. Ал операциядан кейін баланың жүрегі шок салдарынан тоқтап қалды. Сараптама сөзімді дәлелдеп отыр", – деп түсіндіреді аурухананың хирургиялық қызметінің жетекшісі Игорь Белображицкий.
Медициналық және фармацевтикалық бақылау комитетінің Қостанай қаласы бойынша департаментінің қорытындысы бойынша балаға медициналық көмек көрсету кезінде дәрігерлер бірқатар клиникалық диагностика және емдеу хаттамаларын бұзғанын айтты. Дәрігерлерге қатыстысты қылмыстық іс қозғалды.
Кінәлілерді анықтау және олардың іс-әрекеттері дәрігерлік қате болып санала ма, жоқ па деген сұрақтар әлі де қарастырылып жатыр.
Еске салсақ, осыған дейін Ақтөбе облысында алты айлық сәби дәрігерлердің салғырттығынан көз жұмғаны туралы жазған едік.