Қостанай облысына су тасқынынан кейін интернетті қалпына келтіру үшін Starlink терминалдары жеткізілді
Су тасқынынан кейін Қостанай облысына интернетті қалпына келтіру үшін Астанадан 30 Starlink спутниктік интернет-терминалдары жеткізілді. Бұл туралы Stan.kz ақпарат агенттігі хабарлайды.
Фото: Getty Images
Облыс әкімі Құмар Ақсақалов бұған дейін цифрлық даму, инновациялар және аэроғарыш өнеркәсібі министрлігіне тиісті сауал жолдаған екен.
Жақын күндері облысқа Starlink жабдығының тағы 70 жиынтығы жеткізілмек. Білім беру үдерісінің үзіліссіз өтуін қамтамасыз ету үшін бірінші кезекте облыстағы мектептерді жабдықтап жатыр.
Қостанай облысының оңтүстік өңірлерінде интернетке ғана емес, ұялы байланысқа да қатысты мәселелер бар. Әкімдікте атап өтілгендей, ұялы байланыс операторларының зардап шеккен аудандардың тұрғындарына тегін тарифтік пакеттер бөлу мәселесі қарастырылып жатыр.
Амангелді ауылында Beeline, Kcell және Tele2, Торғайда Tele2 және Beeline байланыстары жұмыс істей бастады. Торғайда кешке дейін Kcell/Activ іске қосылады деген болжам бар.