Ақтөбеде қарттар үйінің тұрғындары кешкі астан кейін ауырып қалғандарын айтып көмек сұрады
Ақтөбеде қарттар мен мүгедектерге арналған әлеуметтік орталық тұрғындары консерві, бәліш пен тауық етін жегеннен кейін өздерін жайсыз сезінген. Интернаттағы қарттардың сөздерінше, өткен аптадан бері жағдайлары нашарлап, уланғандай әсерде болған. Бұл туралы Stan.kz ақпарат агенттігі хабарлайды.
Фото: pixabay.com
Бейсенбі күнгі кешкі астан кейін бірнеше адам өздерін жайсыз сезіне бастапты.
“Біз үлкен қиындыққа тап болдық. Интернаттағылардың жартысы уланып қалды. Бейсенбі күні кешкі асқа консерві, бәліш және тауық етін жедік. Содан кейін ауырдық. Мен өзім екі күн бойы раковинаның алдында отырдым. Басында өзім ғана ауырдым деп ойладым. Кейін интернаттағылардың жартысы ауырып жатқанын естідім. Бізге көмектесіңіздер. Бұрын мұндай болған емес. Осында 20 жылдан аса тұрамын. Мұнда дәрі де жоқ. Біз ешкімге керек емес сияқтымыз, көмек керек”, – деді интернат тұрғыны.
Алайда әлеуметтік орталық директоры алаңдайтындай улану болмағанын жеткізді. Сөзінше, онға жуық адам ауырып қалған.
“Алаңдайтын ештеңе жоқ. Улану болмады. Ротавирусты инфекция. Іштегі дәрігерлер қарады. Жағдай қалыпты, емдеп жатыр. Қорқатын ештеңе жоқ. Оншақты адам ауырып қалды. Іштері кепті. Бізде барлық жағдай тұрақты”, –деді №1 Әлеуметтік қызмет көрсету орталығының директоры Асылбек Мұханбетқали.
Орталық директорының айтуынша, интернаттағы жағдай санитариялық-эпидемиологиялық бақылау департаментіне хабарланбаған.