"Көліктер лизингке беріледі, ұялы байланыс тарифтері қымбаттайды": Қазақстанда 1 желтоқсаннан бастап не өзгереді

Фото: Stan.kz

Қазақстанда 1 желтоқсаннан бастап жеке тұлғаларға арналған жаңа автолизинг бағдарламасы іске қосылады. Сондай-ақ тұрғын үй көмегін есептеудің жаңа қағидалары күшіне еніп, ЕуроОдақ VTB Bank Kazakhstan банкіне санкциялар салады. Stan.kz ақпарат агенттігі осы айда тағы қандай маңызды өзгерістер болатынын толығырақ қамтыды.

Көлікті лизингке беру бағдарламасы іске қосылады

1 желтоқсаннан бастап Қазақстанда жеке тұлғаларға арналған жаңа автолизинг бағдарламасы іске қосылады. 

Енді азаматтар көлікті кейін сатып алу немесе кері қайтару шартымен лизинг арқылы алу мүмкіндігіне ие болады. Автолизинг бағдарламасы қазір жұмыс істеп тұрған жеңілдетілген автонесие бағдарламасына қосымша мүмкіндік болмақ.

Депутат Олжас Құсбековтің сөзінше, көлік сатып алудағы қаржылық қиындықтар көптеген қазақстандықтарға таныс. Барлығында бірдей қымбат несие алуға немесе бастапқы жарнаны ұзақ жылдар бойы жинауға мүмкіндік жоқ дейді. 

Фото: freepik.com

Лизинг – автокөлікті ұзақ мерзімге жалға алу, кейін оны сатып алу немесе қайтару мүмкіндігі бар жүйе. Ол автонесиеге балама ретінде қарастырылады.

Сіз автокөлікті таңдайсыз, лизинг компаниясы оны сатып алады және ай сайынғы төлемге уақытша пайдалануыңызға береді. Барлық қаражат толық төленбейінше, автокөлік лизинг компаниясының меншігінде болады.

Лизинг шарттары – пайыздық мөлшерлеме, мерзім, автокөлікті сатып алу құны, айыппұлдар/өсімпұлдар, жүріс лимиті – мемлекетпен реттелмейді. Әр автосалон немесе лизинг беруші компания бұл талаптарды жеке өзі белгілейді.

“Колеса” басылымының хабарлауынша, бастапқы жобаларда бірқатар шектеулер бар. Мысалы, лизинг мерзімі автокөліктің пайдалы пайдалану мерзімінің кемінде 75%-ын құрауы тиіс. Ал сыйақы мен өсімпұл 46% жылдық мөлшерден аспауы керек. Алайда бұл талаптар құжаттың соңғы нұсқасына енгізілмеді. Әзірге лизинг компаниялары нақты ережелерді жариялаған жоқ. Сондықтан жаңалықтарды бақылап отыру қажет.

Бағдарлама азаматтардың автокөлік сатып алу мүмкіндігін арттыру және ішкі автонарықты, соның ішінде Қазақстанда шығарылатын көліктер өндірісін қолдау мақсатында әзірленген.

Автосалондар мен лизинг берушілер үшін бұл – клиенттер базасын кеңейту, жаңа сатылымдар және шарттарды икемді ету мүмкіндігі. Бағдарлама қазақстандық жаңа автокөліктер нарығын жандандыруы мүмкін.

Транстелеком 2025 жылдың 1 желтоқсанынан бастап телефон қызметтерінің бағасын өзгертеді

Стационарлық телефон қызметтерінің бағасы 2025 жылдың 1 желтоқсанынан бастап өзгереді.

Жаңа айлық баға:

Қала орталықтары — 990 теңге (Қосылған құн салығын қоса алғанда) (алдыңғы баға — 797 теңге);

Ауылдық жерлер — 650 теңге (Қосылған құн салығын қоса алғанда) (алдыңғы баға — 529 теңге).

Қосымша ақпарат алу үшін байланыс орталығына 191 нөмірі бойынша хабарласыңыз.

Тұрғын үй көмегі қайта есептеледі

2 желтоқсаннан бастап елде тұрғын үй көмегін есептеудің жаңа қағидалары күшіне енеді. Тиісті бұйрыққа Өнеркәсіп және құрылыс министрі қол қойған.

Жаңартылған ережелер коммуналдық қызметтердің тұтыну нормаларын қайта қарауды қамтиды. Дәл осы нормалар негізінде мемлекет отбасының қанша мөлшерде көмек алуға құқылы екенін есептейді. 

Жаңа нормалар есептеулерді барынша ашық әрі нақты тұтынуға жақындату үшін енгізілді. Әсіресе, коммуналдық жүйеге жүктеме әртүрлі болатын өңірлерге маңызды. Енді тұрғын үй көмегін есептеу кезінде коммуналдық қызметтердің жаңартылған нормативтері қолданылады.

Фото: Stan.kz

Ішкі істер мен Төтенше жағдайлар министрліктері ауқымды тексерістерді бастайды

1 желтоқсаннан бастап Ішкі істер министрлігі мен Төтенше жағдайлар министрлігі ел бойынша сауда орталықтары, базарлар, тұрғын үй аудандары және пиротехника сатылатын орындарда рейдтер жүргізеді.

“Газ баллон” профилактикалық іс-шарасы. Газ баллон жабдығын пайдаланатын үйлер мен нысандарды аралап, рейд жүргізіледі. Инспекторлар қауіпті анықтап, түсіндіру жұмыстарын жүргізеді.

“Қауіпсіз Жаңа жыл” профилактикалық іс-шарасы. Жаңа жыл шаралары өтетін орындарда қауіпсіздік тексеріледі. Эвакуациялық шығу жолдары, өрт дабылы және хабарландыру жүйелері дұрыс жұмыс істеп тұр ма, бәрі қаралады. Кәсіпкерлерге нұсқаулық беріледі.

“Пиротехника” профилактикалық іс-шарасы. Салют, петарда сатылатын және сақталатын орындарда рейдтер ұйымдастырылады.

ЕуроОдақ VTB Bank Kazakhstan банкіне санкциялар салады

2 желтоқсанда Еуропалық Одақ VTB Bank Kazakhstan банкіне ресейлік "Мир" төлем жүйесі үшін карталар шығарғаны үшін санкциялар салады. Еуропалық Комиссияның президенті Урсула фон дер Ляйен тізімге ресейлік балама төлем жүйелеріне қосылған шетелдік банктерді қосып жатқанын айтты. Сондай-ақ арнайы экономикалық аймақтардағы ұйымдармен операцияларды шектеп жатқанын жеткізді. 

VTB Bank Kazakhstan үшін бұл Еуропалық Одақ елдеріндегі контрагенттермен кез келген есеп айырысуға тыйым салуды білдіреді. Бұл шара банктің халықаралық есеп айырысуларға, әсіресе еуро мен доллармен қатысуын бұғаттайды. 

Фото: ВТБ

“Наурыз” бағдарламасына өтінім қабылдау аяқталады

3 қарашада басталған “Наурыз” тұрғын үй бағдарламасына өтінімдер 1 желтоқсанға дейін қабылданады.

Еске салайық, бағдарлама алғашқы баспананы небәрі 10% бастапқы жарнамен және жылдық 7%-дан басталатын мөлшерлемемен алуға мүмкіндік береді.

Шиналарды ауыстыруға санаулы уақыт қалды

“Дөңгелекті көлік құралдарының қауіпсіздігі туралы” техникалық регламентке сәйкес, көліктер қыс мезгілінде қысқы шиналармен жабдықталуы тиіс.

Астанада суық ерте түскендіктен, шинаны желтоқсанға дейін ауыстыру қажет.

Қазақстанда қысқы шиналарды қолдану талабы 1 желтоқсаннан 1 наурызға дейін күшінде болады. Оны орындамаған жағдайда 5 АЕК (19 660 теңге) мөлшерінде айыппұл салынады. Жыл ішінде қайталанған жағдайда айыппұл 20 АЕК (78 640 теңге) болады.

Фото: freepik.com

Қазақстан мен Өзбекстан арасында жаңа рейстер ашылады

Қазақстан мен Өзбекстан туризм және көлік саласындағы ынтымақтастықты кеңейтіп жатыр. 

1 желтоқсаннан бастап SCAT әуе компаниялары келесі бағыттар бойынша тұрақты рейстерді іске қосады:

– Түркістан – Бұхара;

– Түркістан – Үргеніш (Хива);

– Түркістан – Самарқанд.

Әр бағыт бойынша рейстер аптасына үш рет орындалады.

Энергетика және коммуналдық тарифтер

Үш электр станциясының электр энергиясына арналған шекті тарифтері жаңартады. Олар:

"Sintra Energy" ЖШС – 30,02 теңге/кВтсағ;

"KAZ GREEN ENERGY" ЖШС – 36,47 теңге/кВтсағ;

"Aktobe Energy Gaz" ЖШС – 29,65 теңге/кВтсағ.

Энергетика министрлігінің мәліметінше, жаңа компаниялардың нарыққа шығуы біртұтас сатып алушы үшін бағаның өсуіне әсер етпейді. Себебі аталған станциялардың өндіріс көлемі шағын. Сондықтан сатып алынатын электр энергиясының жалпы құнына айтарлықтай ықпал етпейді. Алайда министрлік бизнес үшін электр энергиясының өзіндік құны өзгеруі мүмкін екенін жоққа шығармайды. Егер тарифтердің өзгеруі бөлшек төлемдерге ауысса, ол түпкілікті тұтынушыға да әсер етуі ықтимал.

Дегенмен, Қазақстанда коммуналдық тарифтердің өсуіне уақытша мораторий (тыйым) күшінде.

Фото: tury.ru

Шымбұлақта қысқы маусым ашылады

Алматыдағы Шымбұлақ демалыс орны қысқы маусым үшін 7 желтоқсанда ашылады.

Биыл негізгі жабдықты жалға алу аймағы мен маусымдық шкафтар Медеу базалық станциясына көшірілді. Шымбұлақ станциясында күндізгі пайдалануға арналған қойма шкафтары қолжетімді болады.

Tele2 мен Altel тарифтерді қымбаттатып, желілерге берілетін шексіз трафикті тоқтатпақ

25 желтоқсаннан бастап Tele2 және Altel тарифтік жоспарлардың бағасын өзгертеді. Компания мәліметінше, бұл шешім желілерді жаңарту мен қызмет көрсету шығындарының өсуіне, 2026 жылы қосылған құн салығы мөлшерлемесінің (ҚҚС) ұлғаюына байланысты қабылданған. Абоненттерге барлық өзгерістер SMS арқылы хабарланады.

Сонымен қатар, Tele2 және Altel 1 желтоқсаннан бастап "Шексіз әлем" (Безграничный мир) қызметін тоқтатады. Енді роумингте әлеуметтік желілер мен карталарға шексіз трафик болмайды. Бұған дейін абоненттер белгілі бір ақы төлеп, WhatsApp, Telegram секілді мессенджерлерді, әлеуметтік желілерді және навигация карталарын трафик шектеусіз пайдалана алатын еді. 

Скрин: Threads

Қазір операторлар Біріккен Араб әмірлігі, Қытай, Чехия және Оңтүстік Корея үшін жаңа шарттар ұсынып жатып. Қызметтердің құны таңдалған пакетке және елге байланысты болады. Барлық опциялардың қолданылу мерзімі — 30 күн. Үлкен пакеттерден бөлек, бір күндік опцияларды да қосуға болады.

Шетелдегі жаңартылған байланыс пакеттері

БАӘ және Қытай – "БонВояж" пакеті

Мини: 1 ГБ + 30 минут – 2 990 теңге;
Миди: 3 ГБ + 30 минут – 5 990 теңге;
Макси: 8 ГБ + 30 минут – 10 990 теңге.

Чехия және Оңтүстік Корея

Мини: 1 ГБ + 30 минут – 5 990 теңге;
Миди: 3 ГБ + 30 минут – 8 990 теңге;
Макси: 8 ГБ + 30 минут – 14 990 теңге.

Бір күндік опциялар (барлық төрт ел үшін)

Базалық пакет: 10 минут қоңырау шалу – 980 теңге /1 күн;
Интернет: 300 МБ – 990 теңге /1 күн.

Қазақстандықтар апта ортасында демалады, бірақ 31 желтоқсан жұмыс күні

Өкінішке қарай, жаңа жылдық салаттарды жұмыстан кейін дайындауға тура келеді. Себебі 31 желтоқсан сәрсенбіге түсіп, жұмыс күні болып қала береді.

Қазақстандықтар жаңа жылда төрт күн қатарынан демалады, яғни 2026 жылы 1–4 қаңтар аралығы демалыс. Ал 5-6 қаңтар – жұмыс күндері, ал 7 қаңтар – Рождество мерекесіне орай ресми демалыс.

2025 жылдың желтоқсанында сегіз демалыс күні болады. Бәрі сенбі мен жексенбіге түседі.

16 желтоқсан – Тәуелсіздік күні, ол сейсенбіге түседі және ресми түрде демалыс.