"Кінәлілер жазаланған жоқ": Астанадағы ойын орталығында баланың қолы сынып, ауыр жарақат алды

Фото: Азиза Мұратованың желідегі парақшасынан

Астанадағы ойын-сауық орталығында төрт жасар бала қолынан жарақат алып, жедел түрде ауруханаға жеткізілді. Бұл туралы Stan.kz ақпарат агенттігі хабарлайды.

Оқыс оқиға туралы зардап шеккен баланың анасы әлеуметтік желіде жазды.

Оның айтуынша, оқиға осыдан төрт ай бұрын Нәжімеденов көшесі, 26 мекенжайында орналасқан Babyboom ойын орталығында болған. Бала қолын қатты жарақаттап, ота жасалған.

"Ұлымның төрт сүйегі сынған, алақаны терең жыртылып, сүйекке дейін ашылған. Қан көп кетті, қатты шок алды, тоқтамай жылады. Төрт ай өтті, бірақ бұл ойын орталығы әлі де жұмыс істеп тұр. Кінәлілер ешқандай жазаға тартылған жоқ. Маған жұмыстан шығуға және антидепрессант ішуге тура келді", – деп жазды анасы.

Сонымен қатар ол оқиға кезінде түсірілген бейнежазбаны жариялады. Бейнежазбада баланың жарақат алған сәтінде жанында ешқандай ересек адамның болмағаны көрінеді. Бірақ белгісіз бір ер адам дереу жүгіріп келіп, көмек көрсеткен.

Әлеуметтік желі қолданушыларының кейбірі мұндай ойын алаңдарында балаларды ересектердің қарауынсыз қалдыруға болмайтынын айтса, енді бірі бұл орталықтардың өзінен бастап қауіпсіз болуы керек екенін жеткізді.

Астана полиция департаменті мәлімдегендей, балалар ойын алаңында кәмелетке толмаған баланың жарақат алу фактісі бойынша қылмыстық іс қозғалып, тексеру жүргізіліп жатыр.

"Бейнебақылау камераларындағы жазбалар зерттеліп, сот-техникалық сараптамалар тағайындалды. Оның қорытындысы бойынша қолданыстағы заңнамаға сәйкес шаралар қабылданады. Қазіргі уақытта ойын алаңының басшылығына және жергілікті атқарушы органдарға оқиғаға себеп болған жағдайларды жою туралы ұсыну енгізілді", – деп хабарлады ведомство.

Кеуде және бел омыртқалары сынған: Талдықорғанда бес жасар қыз банкте баспалдақтан құлап кеткен (видео)

Екі рет күрделі ота жасалған: Алматыдағы аттракционда кәмелетке толмаған қыз ми жарақатын алды

Еске салайық, бұған дейін 6 шілдеде Астанадағы Жәнібек Тархан көшесіндегі дәмханалардың біріндегі ойын алаңында баланың табанына медициналық ине кіріп кеткен. Баланың ата-анасының айтуынша, инені әлдекім әдейі тастап кеткен болуы мүмкін. Жарақат алған бала жарты жыл бойы инфекционист дәрігердің бақылауында болады. Оқиға орнына жедел жәрдем мен полиция шақырылғанымен, ата-анасы құқық қорғау органдарының әлі нақты шара қолданбағанын айтады.