Депутат Бақытжан Базарбек 2020 жылғы 24 желтоқсандағы денсаулық сақтау министрінің бұйрығына сәйкес, ақша алынған медициналық қызмет көрсетілмеген болса да, қылмыстық іс қозғалмауы мүмкін екенін атап өтті.

"Қалай болғанда да, мемлекеттік қаражаттың жымқырылуы, әртүрлі жалған көрсеткіштер, медициналық қызметтердің көлемін асыра көрсету және басқа да сыбайлас жемқорлық әрекеттері қылмыстық жауапкершілікке тартуға негіз болуға тиіс. Қалайша бұл қылмыс емес, кемшілік ретінде қарастырылады?" — деп сұрады депутат.

Депутаттың айтуынша, 5.0 деңгейіндегі дефект — "медициналық қызмет көрсетудің расталмаған жағдайы" — бұл іс автоматты түрде құқық қорғау органдарына жіберілмейді. Материалдар тек егер сома 200 АЕК-тен асса ғана тиісті органдарға жіберілетін көрінеді.

"Басқаша айтқанда, осы бұйрыққа сәйкес, қылмыс қылмыс емес, тек кемшілік болып отыр. Осы бұйрық аясында көптеген медициналық ұйымдар үлкен көлемде мемлекет қаражатын заңсыз шығарып, ешқандай қылмыстық жауапкершілікке тартылмайды", — дейді депутат.

Денсаулық сақтау министрі Ақмарал Әлназарова депутаттың пікірімен келісетінін айтты.

"Шынында да қосымша көрсеткіштер, сапасыз медициналық көмек көрсету мәселелері бойынша жазаны қатаңдататын уақыт келді. Біз сіздердің ұсыныстарыңызды ескере отырып, бірнеше түзетулер әзірледік", — деді министр.

Оның айтуынша, депутаттың тиісті ұсыныстары жұмыс тобына берілген.

Депутат Асхат Аймағамбетов одан әрі қатаң шараларды енгізуді ұсынды.

"Қазір лицензияларды қайтарып алу мен қатаң санкциялардан бастап ұсыныстар бар. Сондықтан, әріптестер, келіңіздер, бұл мәселені толыққанды талқылайық. Министр толықтай қолдайды және өзі де солай ұсынады", — деді ол.

Еске салсақ, бұған дейін Қазақстанда МӘМС жүйесіне жарналарды төлеу және қайтару ережелері жаңартылатыны туралы жазған едік.

Талқылау