Қазақстанға шетелден әкелінген жолбарыстардың видеосы тарады
Желіде Қазақстанға Нидерландыдан әкелінген жолбарыстардың Іле-Балқаш мемлекеттік табиғи резерватындағы алғашқы қысқы кезеңі түсірілген видео жарияланды. Бұл туралы Stan.kz ақпарат агенттігі хабарлайды.
Видеодан скрин
Экология және табиғи ресурстар министрлігінің мәліметінше, жануарлар Қазақстанның қысына бейімделген.
“Іле-Балқаш табиғи резерватында жолбарыстардың алғашқы қысқы кезеңін қалай өткеріп жатқаны туралы бейнебақылау камерасына түсірілген сирек кадрлармен бөлісуге қуаныштымыз. Бұл табиғи ортаға бейімделіп, Қазақстанда алғаш рет қысты өткізіп жатқан жыртқыштардың өмірін көру үшін тамаша мүмкіндік”, – делінген экология министрлігінің хабарламасында.
Министрлік мәліметінше, жолбарыстарға ветеринариялық карантинінен кейін үлкен вольерлер ашылған, олардың әрқайсысының ауданы 0,5 гектардан астам.
“Бұл кешен жыртқыштардың барлық қажеттіліктерін ескере отырып мұқият жобаланған, олар еркін қозғалуға және табиғи инстинкттерін көрсетуге мүмкіндік береді. Кең орта олардың жаңа мекенжайға бейімделуіне ықпал етеді. Жолбарыстар тіпті өздерінің тамақтану орнында қоректеніп жүрген қарға мен сауысқандарға аңшылық жасауда”, – делінген хабарламада.
Еске салсақ, бұған дейін Қазақстандағы Тұран жолбарыстарының популяциясын қалпына келтіру үшін Нидерландыдан ұрғашы және еркек жолбарыс әкелініп, Іле-Балқаш қорығына қоныстандырылғаны туралы жазған едік.