Қазақстандық фермерлер қосылған құн салығын өз қалауымен ғана төлейді – Ұлттық экономика министрлігі
Қазақстандық ауыл шаруашылығы тауарын өндірушілерге қосылған құн салығын (ҚҚС) төлеу немесе төлемеуге таңдау құқығы беріледі. Бұл туралы Stan.kz ақпарат агенттігі хабарлайды.
Фото: Pixabay.com
Ұлттық экономика вице-министрі Азамат Амрин фермерлерге жеңілдік барын мәлімдеді.
Мәжіліс алаңында ол президенттің тапсырмасымен алты жұмыс тобының аймақтарға шығып, кәсіпкерлермен кездескенін айтты. Содан кейін жұмыс тобының мүшелері барлық ұсынысты жинақтап, сараптады дейді.
"Кәсіпкерлермен, соның ішінде шаруа қожалықтарымен, ауыл шаруашылығы тауарын өндірушілермен әңгімелесу барысында мөлшерлемені нөлге түсірмей, барлығын сол күйінде қалдыру туралы ұсыныс айтылды. Сондықтан қазір біз таңдау құқығын беріп жатырмыз. Салық төлеуші ҚҚС төлегісі келсе, төлей береді", – деді Амрин.
Оның айтуынша, көптеген кәсіпкерлер ҚҚС есепке алу ставкасын 15 миллионға төмендетуді қолдады, өйткені бұл "нарықтағы адал бәсекелестікке ықпал етеді" депті.
10 ақпанда ұлттық экономика министрлігі ҚҚС мөлшерлемелерін саралаудың келесі механизмін ұсынды:
- жалпы белгіленген ҚҚС ставкасы – 16%;
- бірнеше салалар үшін – 10% аралық мөлшерлеме;
- ауыл шаруашылығы тауарын өндірушілерді ҚҚС-дан толық босату.
Еске салсақ, үкімет қосылған құн салығы бойынша шекті соманы 15 миллион теңгеге дейін төмендетіп, 16% мөлшерлемені таңдаған еді.