Қазақстанда облыстық мәслихат депутаттары іссапар шығындарын бюджеттен өтеуді ұсынды

Фото: Ақорда

Қазақстанда облыстық мәслихат депутаттары іссапар шығындарын өтеу тәртібін енгізуді ұсынды. Бұл туралы Алматы қалалық мәслихатының депутаты Алтынай Көбеева Мәжіліс жанындағы Қоғамдық палатаның отырысында мәлімдеді. Бұл туралы Stan.kz ақпарат агенттігі хабарлайды.

"Шығындарды өтеу туралы норманы толықтыру ұсынылады. Ең болмағанда ел аумағында іссапар шығындарын өтеуді қарастыру қажет", - деді Көбеева "Жергілікті мемлекеттік басқару және өзін-өзі басқару туралы" заң жобасын талқылау барысында.

Депутаттың айтуынша, бұл мәселе республикалық маңызы бар қалалар (Астана, Алматы) мәслихаттарының депутаттары үшін аса өзекті емес, өйткені олардың жұмысы бір қала шеңберінде жүреді. Ал облыстық мәслихат депутаттары жиі аудандық және ауылдық округтерге іссапарға шығуға мәжбүр, сондықтан іссапар шығындарын өтеу олар үшін маңызды.

Сонымен қатар Алтынай Көбеева жергілікті өзін-өзі басқару комитеттері төрағаларының жалақысын арттыруды ұсынды. Оның айтуынша, олар айына орта есеппен 78 мың теңге алады (2025 жылғы ең төменгі жалақы – 85 мың теңге) әрі бұл сомаға демалыс және ауырып қалғаны үшін төлемақы кірмейді. Сонымен бірге, оларға әлеуметтік кепілдік берілмейді.

Көбеева жергілікті өзін-өзі басқару комитеттері төрағаларының, кеңесшілері мен үйлестірушілерінің лауазымдарын жергілікті бюджет есебінен қаржыландыруды және олар үшін толыққанды әлеуметтік кепілдіктер жүйесін әзірлеуді ұсынды. 

Алтынай Көбеева сондай-ақ келесі шараларды ұсынды:
•    Бюджет кодексіне жергілікті өзін-өзі басқаруды міндетті түрде қаржыландыру нормасын енгізу;
•    Мәслихат аппараттарының штат санын ұлғайту, үш депутатқа бір қызметкерден;
•    Мәслихат жанында баспасөз хатшысы лауазымын енгізу, бұл мәслихат жұмысының ашықтығын арттырады;
•    Депутаттарға бюрократиялық рәсімдерсіз шешім қабылдау еркіндігін беру;
•    Аудандық әкімдіктерге жер пайдалану мониторингін жүргізу құқығын беру, бұл жер телімдеріндегі заңсыз нысандарды анықтауды жеделдетеді.