Астаналық Клавдия Козлованың еңбек өтілі – 40 жыл. Ол саналы ғұмырын дәрігер болуға арнаған. 2014 жылы кейуана буын ауруына байланысты II топтағы мүгедек деп танылған. Жаңа жылдан бастап әлеуметтік жәрдемақының өсетіні туралы хабарды қуана қабылдады. Өзі секілді талай мүмкіндігі шектеулі жандарға жаңашылдық айтарлықтай көмек болады дейді.

“Иә, мен мүгедектерге берілетін жәрдемақының өсетінін естідім. Бұл – мүмкіндігі шектеулі жандарға өте үлкен көмек. Біздің Елбасы бірінші кезекте қарапайым халықтың, соның ішінде көмекке мұқтаж жандардың жағдайына қашанда алаңдайды. Әрине, біздің алғысымыз шексіз”, – дейді қала тұрғыны Клавдия Козлова.

Жәрдемақы мөлшері орта есеппен 27 пайызға көбейеді. Бұл туралы Еңбек және халықты әлеуметтік қорғау министрлігі хабарлап отыр.

“Мысал үшін I топтағы мүгедектер 2017 жылы 43 мың 538 теңге алатын болса, жаңа жылдан бастап 54 мың 306 теңге алатын болады. Екінші топтағы мүгедектер 33 мың 999 теңге алатын болса, енді 43 мың 275 теңге алатын болады. Сәйкесінше III топтағы мүгедектер 23 мың 97 теңге алатын болса, 29 мың 416 теңге алатын болады”, – дейді ҚР ЕХӘҚМ әлеуметтік қамсыздандыру және әлеуметтік сақтандыру департаментінің бас сарапшысы Ғазиза Иманғали.

Жаңа сипаттағы атаулы әлеуметтік көмек жәрдемақы түрлерін біріктіре отырып, оңтайландыруды және мөлшерін көбейтуге мүмкіндік береді. Бұл атаулы әлеуметтік көмек – кәмелетке жасы толмаған балалары бар әлеуметтік жағынан аз қамтылған отбасыларға және көпбалалы отбасыларға берілетін жәрдемақы. Ал соңғысы бойынша 2018 жылға дейін жәрдемақы алып келгендер үшін өзгеріс болмайды.

Жәрдемақы мөлшерін көбейту кедейлік шегі мен ең төменгі күнкөріс деңгейін көтеру арқылы мүмкін болды. Енді бұл көрсеткіш 28 мың 284 теңгені құрайды. Өткен жылмен салыстарғанда 16 пайызға артты.

Еліміз бойынша жаңа сипаттағы атаулы әлеуметтік көмек бір млн-ға жуық адамға беріледі. Мемлекет халықты тек материалдық тұрғыдан ғана емес, жұмыспен де қамтамасыз етуді көздеп отыр.

“Жұмысқа тарту шараларын жүргіземіз. Егер жұмыспен тарту шараларына белгілі бір себептермен қатыса алмаса, кәсіби мамандығы немесе біліктілігі жоқ болса, онда біз бұл орайда осы еңбекке қабілетті мүшесін отбасының қайта даярлау курстарына жолдаймыз. Қайта даярлау курстарына қатысқан үшін шәкіртақы, стипендия тағайындалатын болады”, – дейді ҚР ЕХӘҚМ әлеуметтік қамсыздандыру және әлеуметтік сақтандыру департаментінің бас сарапшысы Асқар Ниязов.

Әлеуметтік көмекті оның атаулы сипатын күшейте отырып, оңтайландыру – Елбасы тапсырмасы. «100 нақты қадам» Ұлт жоспарының 84-қадамында атаулы көмекті нақты иелеріне беру туралы айтылған.

Оқи отырыңыз:

Белгілі айтыскер ақындар Сәкен Майғазиевке арнап жарыса өлең жазып жатыр

Атышулы Дәурен Айдарқұлов: Мекке шаһарына баруды жоспарлап отырмын

Қайрат Түнтеков “I’m a singer Kazakhstan” жобасында жеңімпаз атанды

Ерлан Қарин көпшіліктің наразылығын тудырған «Қозы мен Баян» телехикаясына қатысты дауға жауап берді

Тұрсынғали Алагөзов жартылай жалаңаш Баян Мақсатқызын періштеге теңеді (видео)

Талқылау