"3,9 миллион басқа жетті": Қазақстанда киіктер атылады

Фото: Маңғыстау облысы табиғи ресурстар және табиғат пайдалануды реттеу басқармасы

Елімізде киіктердің саны рекордтық деңгейге жетті. 2025 жылғы есептеу нәтижесі бойынша киіктердің саны 3,9 миллион басқа жеткен. Бұл туралы Stan.kz ақпарат агенттігі хабарлайды.

Киіктердің санының өсуі ауыл шаруашылығы алқаптарына орасан зор зиян келтіріп отыр. Фермерлердің айтуынша, киіктер шаруашылыққа жүздеген миллион теңгеге дейін шығын келтірген.

"Бұл көрсеткіш 1974 жылғы тарихи шекті межеден үш есе көп. Ол кезде киіктердің саны 1,2 миллион болған еді. Ғылыми қорытындыларға сүйене отырып, киік санын реттеу туралы шешім қабылданды", – деді Экология және табиғи ресурстар министрі Ерлан Нысанбаев Батыс Қазақстан облысындағы фермерлермен кездесуде.

Министр Қазақстанда киік санын реттеу мақсатында оларды ату жұмыстары қайта жанданатынын айтты.

Мұндай шешім Қазақстандағы Зоология институтының ғалымдарының қорытындысы негізінде қабылданды. Сонымен қатар министрлік АҚШ, Аустралия, Финляндия, Канада және Оңтүстік Африка елдерінің жабайы жануарлар популяциясын басқарудағы тәжірибесіне сеніп отыр.

"Ғылыми тұжырымдар, фермерлердің ұсыныстары және әлемде кейбір жануар түрлерінің санын реттеу тәжірибесі негізінде киік санын реттеу туралы шешім қабылданды", – деді Ерлан Нысанбаев.

Бұған дейін министр Батыс Қазақстан облысындағы фермерлермен кездескен еді. Олар киіктердің ауыл шаруашылығы алқаптарына келтіріп жатқан апатты зардаптары туралы айтып берді. Аймақтағы киік саны 2,3 миллионнан асқан.

"Егістіктер жойылып жатыр, мал жайылатын жер қалмады, киік санының қатты көбеюі ауыл шаруашылығының жұмысын тоқтату қаупін тудырып отыр. Аграршылардың айтуынша, бұл тек табиғи фактор емес – жүйелі дағдарысқа айналып барады. Кей аудандарда егін мен жайылымдардың тапталуынан келетін шығын жүздеген миллион теңгеге жетіп отыр", – деп хабарлады экология министрлігінің баспасөз қызметі.

Нәтижесінде фермерлер инвестицияларынан, мал азығы мен малынан айырылып отыр. Министрлік өкілдері бұл жағдай өңірдің азық-түлік қауіпсіздігіне қатер төндіріп отырғанын атап өтті.