Қазақстан мен Франция президенттері 2,2 миллиард долларға келісімшартқа отырды
Қазақстан мен Франция президенттері стратегиялық серіктестікті одан әрі жандандыруға бағытталған бірлескен декларация қабылдады. Бұл туралы Stan.kz ақпарат агенттігі хабарлайды.
Фото: akorda.kz
Декларациядан кейін мемлекеттер басшыларының қатысуымен келесі құжаттарға қол қойылды:
- Қазақстан Республикасының Үкіметі мен Француз Республикасының Үкіметі арасындағы реадмиссиялау туралы келісім;
- Аса маңызды материалдар мен ресурстар бойынша Қазақстан мен Францияның стратегиялық ынтымақтастығының жол картасы;
- "Самұрық-Қазына" ұлттық әл-ауқат қоры" акционерлік қоғамы мен Société Generale S.A. компаниясы арасындағы стратегиялық ынтымақтастық туралы келісім;
- "Қазақстан темір жолы" ұлттық компаниясы" акционерлік қоғамы мен "Alstom Transport SA" компаниясы арасындағы 6 осьті электровоздар бойынша стратегиялық ынтымақтастық туралы келісім;
- Ә.Х. Марғұлан атындағы Археология институты мен Ұлттық превентивті археологиялық зерттеулер институты (INRAP) арасындағы археология саласындағы ынтымақтастық туралы келісім хаттамасы.
Жалпы Президент Қасым-Жомарт Тоқаевтың Парижге мемлекеттік сапары аясында екі ел делегациясының мүшелері 36 құжатқа қол қойды. Оның ішінде жалпы сомасы 2,2 миллиард долларды құрайтын 1 үкіметаралық, 21 ведомствоаралық және 14 коммерциялық құжат бар.
Еске салсақ, бұған дейін Қазақстан мен Франция президенттері Елисей сарайының бағында бейресми әңгіме өткізіп, қазақ тазыларымен серуендегені туралы жазған едік.