Қазақстан іздеуде жүрген блогер Mellstroy-ды көргендерге сыйақы бермек, алайда оның мөлшерін айтпады

Фото: Mellstoy / instagram.com/mellstroy

Қазақстан Mellstroy деген атпен танымал беларусьтік блогер Андрей Буримға халықаралық іздеу жариялады. Блогердің қайда екенін хабарлағандарға сыйақы беріледі. Бұл туралы Stan.kz ақпарат агентігі Tengrinews сайтына сілтеме жасап хабарлайды.

Десе де Қаржы мониторингі агенттігі сыйақы сомасы туралы ақпарат құпия екенін мәлімдеді.

“Күдіктінің қайда екені туралы ақпаратқа берілетін сыйақы сомасы құпия саналады. Мұндай ақпаратты таратуға қолданыстағы заңнамамен тыйым салынған”, – делінген мәлімдемеде.

Ведомство мәліметінше, ақпарат берген адамның аты-жөні құпия сақталады және сыйақы алуына толық кепілдік беріледі.

Скрин: qamqor.gov.kz

Айта кетейік, бұған дейін Астана қаласы бойынша ҚМА департаменті Беларусь Республикасының азаматы, “Mellstroy” лақап атымен танымал блогер Бурим Андрей Александровичке (15.12.1988 ж.т.) халықаралық іздеу жариялаған еді. 

Қаржылық мониторинг агенттігінің хабарлауынша, сот Буримға қатысты "қамауда ұстау" түріндегі бұлтартпау шарасын санкциялады.

Ол әлеуметтік желілер арқылы Қазақстан пайдаланушыларын да нысанаға алған онлайн казино "Mellstroy.game" платформасын заңсыз ілгерілету мақсатында ауқымды жарнамалық науқан ұйымдастырды деген күдікке ілінуде.

Онлайн казиноны жарнамалау үшін блогер әртүрлі ұтыс ойындары мен челлендждерді жариялаған.

Қатысушыларға TikTok, YouTube Shorts және басқа да әлеуметтік желілерде Mellstroy.game атауын, казино логотиптерін және сайт сілтемелерін көрсететін видеолар түсіру ұсынылған.

Бұған дейін Бурим Ресей Федерациясында тікелей эфир кезінде адамды ұрып-соққаны үшін жауапкершілікке тартылған. Сонымен қатар 2025 жылдың қараша айында Беларусь Республикасының Минск қалалық соты блогердің барлық платформадағы арналары мен оның логотиптерін экстремистік материалдар деп таныды.

Mellstroy кім?

Андрей Бурим — интернеттегі ең даулы стримерлердің бірі. Бастапқыда ол ойын трансляцияларымен танылған, бірақ көп ұзамай трэш-стрим форматына ауысқан. Онда ішімдік, провокациялар, донат үшін жасалатын түрлі тапсырмалар беріледі. Оның негізгі аудиториясы — ТМД елдерінің жастары.

Қараша айының басында Беларусь билігі Mellstroy-дың арналарын экстремистік деп таныды. Бұған оның онлайн-конкурсы елдегі бұзақылық әрекеттер мен рұқсатсыз жиындардың көбейуіне түрткі болуына байланысты қабылданған шешім себеп болды.

Mellstroy бұған дейін Ресейде де жауапқа тартылған. Оған тікелей эфир кезінде адам ұрып-соққаны үшін оған түзеу жұмыстары мен айыппұл тағайындалған.