Қазақстан 65 миллион долларлық халықаралық сот дауын жеңіп шықты
11 наурызда өткен брифингте әділет министрлігінің ресми өкілі Талғат Уәли канадалық уран өндіруші World Wide Minerals компаниясының Қазақстанға қарсы талап-арызы бойынша даудың қалай аяқталғанын айтты. Бұл туралы Stan.kz ақпарат агенттігі хабардайды.
Фото: Jonesday.com
Талғат Уәлидің айтуынша, бұл дау 12 жылға созылған.
"2025 жылдың 28 ақпанында 2013 жылдан бері жалғасып келе жатқан канадалық уран өндіруші World Wide Minerals компаниясының Қазақстанға қарсы талап-арызы бойынша Лондонның Жоғарғы соты оң шешім шығарды. Бұл шешімге сәйкес, Канада талапкерлерге шамамен 65 миллион доллар төлеуге тиіс болды", – деді ол.
Талғат Уәлидің сөзінше, WWM-нің талаптары Қазақстан үкіметінің 1997 жылы уран экспорттауға лицензия беруден бас тартқанына және Целин тау-химия комбинатын (қазіргі Степногорск тау-химия комбинаты) сенімгерлік басқару келісімшартын бұзғанына негізделген. 2025 жылғы сот шешіміне сәйкес, Қазақстанның WWM алдында ешқандай міндеттемелері жоқ.
"Ағылшын сотындағы шағымдану стандарттары өте жоғары, және бұл негіз бойынша даудың 2%-дан азы ғана сәтті аяқталады. Осылайша, Әділет министрлігі, мемлекеттік органдар және үкіметтің кеңесшісі үйлесімді жұмыс атқарып, Қазақстанның бюджет қаражатын едәуір үнемдеп қана қоймай, елдегі инвестициялық ахуалды сақтап, халықаралық аренадағы беделін қорғап қалды", – деп түйіндеді Уәли.
Еске салайық, "Стати ісі" – Қазақстан мен молдовалық кәсіпкерлер Анатол және Габриэль Стати арасындағы ұзаққа созылған құқықтық дау. Бұл дау 2010 жылы Статилердің Қазақстан үкіметіне қарсы инвестицияларын заңсыз тартып алды деген айыптауымен басталған. 2013 жылы Стокгольм арбитраждық соты Қазақстанды Статилерге 500 миллион доллар өтемақы төлеуге міндеттеген шешім шығарды.
2024 жылдың желтоқсанында Қазақстан үкіметі, Ұлттық банк және Стати тараптары ұзаққа созылған дауды реттеу туралы келісімге қол жеткізді. Бұл келісім барлық құқықтық дауды тоқтатуды және болашақта оларды қайта бастау мүмкіндігін жоққа шығаруды қарастырады.