Қылмыстық іс Қарағанды қаласы Қазыбек би аудандық сотында қаралды. Соттың мәліметінше, сотталушы лото клубының тұрақты келушісі болып, ірі көлемдегі ұтылыстан кейін қарақшылық шабуыл жасаған. Ер адам қайын атасының көлігін сатудан түскен үш миллион теңге ақшасын ұтылып қалған.

"Т.Т.-ға ұқсас ойыншық тапаншамен қаруланған азамат клубқа кіріп, екі қызметкерді қорқытып, сейфтегі 3,9 миллион теңгені ұрлап кеткен. Тонау оқиғасы клубта орнатылған бейнебақылау камерасына түсіп қалған", - делінген қылмыстық іс материалдарында.

Сотта ер адам өз кінәсін толық мойындап, тек ақшасын қайтарып алғысы келетінін айтты. Сотталушы клубқа келтірілген шығынды толық өтеді, жәбірленуші тарап сотталушыны бас бостандығынан айыруды талап етпеді.

"Қазыбек би аудандық соты іс бойынша жиналған барлық дәлелдемелерді зерделеп, сотталушыны Қазақстан Республикасы Қылмыстық кодексінің 191-бабы 3-бөлігінің 1, 3-тармақтары бойынша кінәлі деп таныды. Сот оны бес жылға бас бостандығынан айырды", - делінген сот хабарламасында.

Сотталушы кейін бірінші сатыдағы сот үкіміне шағымданған. Оның адвокаты соттан сотталушыны бас бостандығынан айыру жазасын бас бостандығын шектеу жазасына ауыстыруды сұрады.

"Қарағанды облыстық соты сотталушы мен оның адвокатының апелляциялық шағымын қанағаттандырмады. Бірінші сатыдағы соттың үкімі өзгеріссіз қалдырылды", - делінген сот залындағы апелляциялық алқаның қаулысында.

Талқылау