Kaspi.kz акционерлерінің бірі Вячеслав Ким Jusan Bank-ті сатып алатынын растады
Kaspi.kz акционерлерінің бірі Вячеслав Ким Jusan Bank акцияларының бақылау пакетін сатып алмақ ниетте екенін растады. Бұл туралы Stan.kz ақпарат агенттігі хабарлайды.
Фото: olympic.kz
Вячеслав Ким Қаржы нарығын реттеу және дамыту агенттігіне өтініш тастаған.
“Мен Қаржы нарығын реттеу және дамыту агенттігіне Jusan Bank акцияларының 97,5%-ын сатып алу туралы өтініш бердім. Бұл өтінішті агенттік қарастырып жатыр. Реттегіш өтінішті егжей-тегжейлі зерттегеннен кейін шешім қабылдайды. Бұл транзакцияның Kaspi.kz компаниясына еш қатысы жоқ”, – дейді Вячеслав Ким.
Мұндай ақпарат ақпан айының басында пайда болды. Алайда кәсіпкердің өзі де, мемлекеттік реттеушілер де бұл туралы түсініктеме бермеді.
Бұл өтінішке қатысты Қаржы нарығын реттеу және дамыту агенттігі "Курсивтің” сұрауына жауап берген.
“Заң талаптарына сәйкес, Агенттіктің алдын ала жазбаша келісімінсіз ешкімнің жеке дара немесе басқа тұлғамен бірлесіп банктің ірі қатысушысы немесе банк холдингі мәртебесін алуға құқығы жоқ. Келісім беру – мемлекеттің құзырындағы қызмет. Ол 50 жұмыс күнінде қаралады. Сұралған ақпаратқа қатысты, азаматтар арасындағы азаматтық құқықтар мен міндеттерді белгілеуге, өзгертуге және тоқтатуға бағытталған мәміле коммерциялық құпияға жататынын хабарлаймыз. Коммерциялық құпия болып саналатын мәліметтерді алу құқығы бар тұлғалар шеңберін азаматтар мен заңды тұлғалар дербес белгілейді”, – делінген хабарламада.
Сол себепті агенттік бұл өтінішке қатысты белгіленген азаматтар мен заңды тұлғаларға жүгінуді ұсынды.
Еске салайық, Bloomberg 2024 жылдың қыркүйегінде Кимнің Jusan Bank-ті сатып алуды жоспарлап отырғанын хабарлады. Сондай-ақ Вячеслав Ким Ғалымжан Есеновке тиесілі 99,74 пайыз акцияны алатыны туралы ақпарат тарады.