Автор әкесінің өмірі мен шығармашылығы туралы жеке естеліктерін бөлісіп, Кемел Тоқаевтың қиындыққа толы балалық шағы, оның майдандағы жастық кезі мен соғыстан кейінгі шығармашылық жолы туралы әңгімелейді. Автор анасы Тұрар Шабарбаеваға арнайы бөлім арнаған.

Анасы жазушының өмірлік адал серігі, отбасының ұйытқысы болғанын айтады. Өзінің ата-анасына және жақындарына деген сүйіспеншілік сезімін терең жеткізеді.

“Президенттің отбасы құндылықтары, борыш пен жауапкершілік, аға ұрпақтың мұрасы туралы ой-толғаулары кітапта айқын көрініс тапқан. Қасым-Жомарт Тоқаевтың бұл туындыда баяндаған шынайы толғаныстары жас ұрпақ тәрбиесі үшін мәні терең, маңызы зор. Кемел Тоқаев ХХ ғасырдағы отандық әдебиетте жарқын із қалдырды. Шығармалары қаламдастары, сыншылар мен оқырман тарапынан жоғары бағаланып, Қазақстан мен Кеңес Одағында бестселлерге айналды”, – деп жазды мәдениет және ақпарат министрлігі.

Президенттің аудиокітабы Kitap.kz, Topiq.kz, Kazneb.kz қосымшаларында да қолжетімді.

“Жақында Ұлы Жеңістің 80 жылдығын мерекелеу аясында adebiportal.kz порталында қазақстандық майдангер-жазушылардың аудиокітаптары орналастырылады: Бауыржан Момышұлы "Артымызда Москва, Тахауи Ахтанов "Қаһарлы күндер", Әбдіжәміл Нұрпейісов "Күткен күн", Әзілхан Нұршайықов "Ақиқат пен аңыз", Кемел Тоқаев "Солдат соғысқа кетті", Қасым Аманжолов "Ақын өлімі туралы аңыз", – делінген хабарламада.

Бұған дейін мемлекет басшысы әкесі туралы фильм түсіруге қатысты пікір білдірген еді.

Талқылау