Қарамағындағы қызметкері пара алғаны үшін Нұр-Сұлтан әкімінің орынбасары жазаланды
Елорда әкімі Алтай Көлгінов өзінің орынбасары Бақтияр Мәкенді қарамағындағы қызметкерінің сыбайлас жемқорлық әрекеті үшін жазалады, деп хабарлайды Stan.kz ақпарат агенттігі.
Қаңтар айының соңында Нұр-Сұлтан қаласының Мәдениет және спорт басқармасының бұрынғы басшысы Нұрлан Сыдықов ірі мөлшерде бопсалау арқылы пара алғаны үшін бес жылға бас бостандығынан айырылды.
"ҚР Мемлекеттік қызметі туралы" заңға сәйкес Сыдықовтың үкімінен кейін бұрын басқарманы басқарған әкімнің орынбасары Бақтияр Мәкен отставкаға өтініш берді.
"Әлеуметтік салада жүргізіліп жатқан жұмыстардың жоғары тиімділігі мен нәтижелілігін, сондай-ақ қылмыстық іске қатысы жоқтығын ескере отырып, Бақтияр Мәкеннің отставкасы қабылданған жоқ. Соған қарамастан оған қатаң сөгіс жарияланды", - деп мәлімдеді Нұр-Сұлтан әкімдігінде.
Мәдениет пен спорттан басқа, Мәкен білім беру, дін, жастар саясаты, халықтың әлеуметтік осал топтарымен жұмыс сияқты салаларға жетекшілік етеді.