Мәліметтерге сенсек, 1990 жылы туған жергілікті тұрғын Гүлнар Бейішанова биыл 27 қаңтарда Үржар ауданының Көпсалалы орталық ауруханасының босану бөліміне түскен. Ол жүктіліктің 40-аптасында болған, төртінші баласы – ұлды күтіп жүрген. Ауруханаға 17 жастағы үлкен қызымен бірге келген.

Қайғылы оқиға 28 қаңтар күні кешкі сағат 20:00 шамасында болған. Дәл осы уақытта 35 жастағы келіншек босану креслосында нәрестесімен бірге қайтыс болған. Бұл жағдай марқұмның туыстары мен таныстарын қатты есеңгіреткен. Өйткені әйел денсаулығында мүлдемкінәрат болмаған. Күйеуі сол күні таңертең әйелінің хабарсыз кеткеніне алаңдап, бірнеше рет оның жағдайын білуге тырысқан. Алайда ер адамды перзентханаға кіргізбей, ешқандай ақпарат бермеген.

Сараптама мәліметтеріне сәйкес қайтыс болған әйелдің денесінен көптеген жабық қабырға мен кеуде сынулары анықталған. Сонымен қатар өлімге себеп болуы мүмкін жарақат артерия аймағында табылған. Мұндай жарақат шприцтің кесірінен болуы ықтимал. Соның салдарынан ішкі қан кету басталып, кейбір органдар мен тіндер ісініп, кейіннен өлімге әкелген.

Марқұмның күйеуі Ұлан Балапанов сараптама нәтижелерін бөлісті.

"Әйелімнің денесіне қарай алмадым. Оның бүкіл денесі жарақаттанған, көгерген, ауыр азап шеккені көрініп тұрды. Сараптама нәтижелерін алған соң ғана фотоларды қарадым – қабырғалары мен кеудесі сынған екен. Сарапшылар оған ауыр дене жарақаты салынғанын айтады", – дейді Ұлан Балапанов.

"Үржар ауданы полиция бөлімінің қызметкерлері медицина қызметкерлерінің өз міндеттерін тиісінше орындамауы мүмкін деген күдікпен сотқа дейінгі тергеу жүргізіп жатыр. Жағдайды жан-жақты әрі толық зерттеу үшін қажетті тергеу шаралары басталып кетті. Бірнеше сот-медициналық сараптама тағайындалды. Сараптамалардың нәтижелері бойынша процессуалдық шешім қабылданады", – деп хабарлады Абай облысы Полиция департаментінің баспасөз қызметі.

Қылмыстық іс Қылмыстық кодексінің 317-бабы "Медициналық немесе фармацевтикалық қызметкердің кәсіби міндеттерін тиісінше орындамауы" бойынша тергеліп жатыр.

Айта кетейік, Ұлан Балапанов бір ай бойы өз бетінше тергеу жүргізіп келеді. Ақпан айында ол перзентхана бөлімшесіндегі басқа пациенттермен сөйлесіп, әйелінің босануға дейінгі жағдайын білмек болған.

"Маған 27 қаңтар күні дәрігерлер оған екпе салып, 24 сағат күту керек екенін айтқанын жеткізді. Ал 28 қаңтар күні таңертең әйелімнің жағдайы күрт нашарлап, жүрегі айнып, мұрнынан қан кеткен. Одан кейін не болғанын білмеймін, түске дейін менімен байланысқа шықпады. Полиция әділ тергеу жүргізеді деп үміттенемін", – деді Ұлан Балапанов.

Марқұмның артында қалған үш баланың үлкендері – 15 және 17 жаста, Семейде оқиды. Кенже қызы 4-сыныпта оқиды, әкесі және атасымен бірге Үржарда тұрады. Ұлан Балапанов – күзетші болып жұмыс істейді, ал оның қайтыс болған жұбайы балабақшада тәрбиеші көмекшісі болып еңбек еткен.

Былтыр бұл тату отбасы өз үйлерін салып бітірген еді. Бұл мақсатта Гүлнар Бейішанова бірнеше банктен несие рәсімдеген. Енді бұл қарыздарды жалғыз өзі өтеу Ұлан Балапановқа жүктеліп отыр.

"Банктерге барып, жағдайымды түсіндірдім. Бірақ маған ешқандай қарызды кешірмейтінін, жеңілдіктер қарастырылмағанын айтты. Тек жарты жылға кейінге шегеру мүмкіндігін берді. Қалай төлейтінімді білмеймін, қосымша жұмыс іздеуге тура келеді", – дейді ер адам.

Абай облыстық денсаулық сақтау басқармасы қылмыстық тергеу жүріп жатқандықтан бұл жағдайға түсініктеме беруден бас тартты.

Абай облысында перзентханада сәбиімен бірге көз жұмған жүкті әйелдің өліміне не себеп болғаны анықталды

Еске салайық, қайғылы оқиғадан кейін, қаңтардың соңында, Үржар аудандық ауруханасына тәуелсіз сарапшылардан құралған мониторингтік топ жіберілді. Қызметтік тексеріс барысында барлық босандыру процедуралары протоколға сәйкес жүргізілгені анықталған. Алайда күтпеген асқынулар қайғылы жағдайға әкеліп соққан.

Сол кезде жедел штабтың нұсқауымен және еңбек заңнамасына сәйкес аурухананың бас дәрігеріне қатаң сөгіс жарияланды. Сонымен қатар бас дәрігердің орынбасарын жұмыстан босату және осы оқиғаға қатысы бар дәрігерлерді тергеу аяқталғанша қызметінен уақытша шеттету туралы ұсыныстар берілді.

Қазір Үржар тұрғыны екінші – фармацевтикалық сараптаманың нәтижесін күтіп отыр. Бұл зерттеу оқиғаның мән-жайын одан әрі айқындап, марқұмның нақты неден көз жұмғанын көрсетпек. Егер сараптама дәрігерлердің кінәсін дәлелдесе, олар қызметтен шеттетіледі. Бірақ Ұлан Балапановтың айтуынша, осы уақытқа дейін күдікке ілінген дәрігерлер өз орындарында жұмысын жалғастырып жатыр.

Талқылау