Ішкі істер министрі кей полицейлерге қатысты шешуші шара қолдануды талап етті

Фото: Ақорда

Ішкі істер министрлігінде жеке құрам арасында тәртіп пен заңдылықты қамтамасыз ету мәселесін арнайы қарауға арналған кеңейтілген алқа отырысы өтті. Бұл туралы Stan.kz ақпарат агенттігі хабарлайды.

Ішкі істер министрі Ержан Сәденов қызметтің барлық қиындығы мен тәуекеліне қарамастан, полицейлердің басым бөлігі күн сайын өз міндеттерін адал атқаратынын баса айтты.

"Күн сайын мыңдаған қызметкеріміз шынайы ерлік жасап, абыроймен қызмет етіп, адамдарды қорғап жүр. Бірақ жекелеген құқықбұзушылық оқиғалары бұл жұмыстардың барлығын жоққа шығарады. Бұл бізге жақсы әсер етпейді", – деді министр.

Біз қылмыскерлерден емес, полициядан қорқамыз – Депутат

Осыған байланысты аумақтық бөлімшелердің басшыларына жеке құрам орналасқан жеріне келгеннен кейін олардың арасында тәртіпті нығайтуға дереу кірісу – жеке профилактикалық жұмыстарды жүргізу, жас қызметкерлер үшін тәлімгерлік жұмысын күшейту, ашық соттар мен офицерлер жиналыстарын белсендірек өткізу тапсырылды.

"Ол қызметтік тәртіпті бұзуға бейім тұлғаларға арнайы қадағалау орнатуды, ал жақсара алмайтындарға шешуші кадрлық шаралар қолдануды талап етті", – деді ІІМ баспасөз қызметі.

Еске салайық, бұған дейін әлеуметтік желіде полиция қызметкерлері 77 жастағы әжеге жабылып, кейін біреуі қарияны қатты итеріп, қабырғасын сындырған видеосы тараған еді.