ХОК 2028 жылы Лос-Анджелесте өтетін олимпиадаға бокс бойынша жаңа салмақ дәрежелерін бекітті
Халықаралық Олимпиада комитеті бокстағы салмақ дәрежелері құрылымын ресми түрде өзгертті. Бұл туралы Stan.kz ақпарат агенттігі хабарлайды.
Фото: Stan.kz
Бокстағы жаңа өзгерістер 2028 жылдың 14-29 шілде аралығында өтетін Лос-Анджелестегі Олимпиада ойындарында күшіне енеді.
Олимпиада тарихында алғаш рет ерлер мен әйелдер саны теңеседі, енді екі аталымда да 124 қатысушыдан болады. Бұл шешім – ХОК-тың Олимпиада ойындарында гендерлік теңдікті қамтамасыз етуге бағытталған әрекеттерінің бір бөлігі.
"Бұған дейін біз боксты Олимпиада-2028 бағдарламасына қосу туралы шешім қабылдаған едік. Енді гендерлік теңдікті ескере отырып, әр категорияда жеті медаль жиынтығы болады. Әйелдерге бір жаңа салмақ дәрежесі қосылды,” – деді ХОК спорт директоры Кит Макконнелл.
Ендеше 2028 жылғы Лос-Анджелесте өтетін Олимпиадасында әйелдер арасындағы салмақ дәрежелері (124 боксшы): 51 кг, 54 кг, 57 кг, 60 кг, 65 кг, 70 кг, 75 кг.
Ал ерлер арасындағы салмақ дәрежелері (124 боксшы): 55 кг, 60 кг, 65 кг, 70 кг, 80 кг, 90 кг, +90 кг.
Осылайша, әйелдер бағдарламасы бір салмақ дәрежесіне ұлғайтылып, жетіге жетті. Ал ерлерде сан өзгермегенімен, салмақ межелері өзгертілді.
Бұған дейін, Париж-2024 Олимпиадасында спортшылар мын салмақта өнер көрсеткен:
Әйелдер: 50 кг, 54 кг, 57 кг, 60 кг, 66 кг, 75 кг
Ерлер: 51 кг, 57 кг, 63,5 кг, 71 кг, 80 кг, 92 кг, +92 кг.
