ХАМАС Газа секторында атысты тоқтату және ондаған кепілді босату туралы келісім жобасын қабылдады. Америка Құрама Штаттары мен Катар делдалдары Израиль мен Палестинаның радикалды қозғалысы 15 айға созылған соғысты тоқтатуға бір қадам жақындағанын айтты.

Associated Press агенттігі ұсынылған келісімнің көшірмесін алғанын және Мысыр шенеунігі мен ХАМАС өкілі оның шынайылығын растағанын хабарлады. Израиль шенеунігі келісімге қол жеткізілгенін, бірақ егжей-тегжейлері әлі пысықталып жатқанын айтты.

АҚШ мемлекеттік хатшысы Энтони Блинкен келісім "өте жақын" екенін айтып, оны 20 қаңтарда сайланатын президент Дональд Трамптың инаугурациясына дейін аяқтауға үміттенетінін айтты.

Келіссөздерден хабардар америкалық шенеунік келісімде әлі де проблемалар бар екенін мойындады.

Бір жылдан астам уақыт Мысыр және Катар елдері, АҚШ билігі бейбіт келісім үшін тырысты. Былтыр бірнеше рет келісімге қол жеткізудің алдында тұрғаны жарияланды, бірақ келіссөздердің әрқайсысы тығырыққа тірелді.

Бұған Израильдің әскерді шығаруының егжей-тегжейлері және палестиналық тұтқындарға кепілге алынғандарды айырбастау сияқты бірқатар даулы мәселелер кедергі келтірді. Енді ХАМАС ішінара алмасуға келісті.

ХАМАС бұған дейін Израиль әскерін шығармайынша, Газада кепілге алынған бірқатар израильдіктерді босатпайтынын мәлімдеген. Өз кезегінде Израиль премьер-министрі Биньямин Нетаньяху содырларды "толық жеңіске" жеткенше күресті жалғастыруға уәде берді.

Келіссөздер "кезеңдік атысты тоқтату" деп аталатын келісімді қамтиды. Беньямин Нетаньяху тек бірнеше апта соғыс қимылдарын тоқтатудың орнына кепілге алынғандарды ішінара босатумен келісетінін айтты. Бірінші кезең басталғаннан кейін ұзақ мерзімді атысты тоқтату мүмкіндігі талқыланады.

Талқылау